ዘሰፎንያስ ፡ ነቢይ ።

1    1 ቃለ ፡ እግዚአብሔር ፡ ዘኮነ ፡ ኀበ ፡ ሰፎንያስ ፡ ወልደ ፡ ኵስ ፡ ወልደ ፡ ጎዶልያ ፡ አሞራዊ ፡ ዘስየዴቅያ ፡ በመዋዕለ ፡ ዮስያ ፡ ወልደ ፡ አሞጽ ፡ ንጉሥ ፡ ይሁዳ ። 2 ኀሊቀ ፡ የኀልቁ ፡ እምገጸ ፡ ምድር ፤ ይቤ ፡ እግዚአብሔር ። 3 የኀልቅ ፡ ሰብእ ፡ ወእንስሳ ፡ ወየኀልቅ ፡ አዕዋፈ ፡ ሰማይ ፡ ወዓሣተ ፡ ባሕር ፡ ወይደክሙ ፡ ኃጥኣን ፡ ወኣጠፍኦሙ ፡ ለዐማፅያን ፡ እምገጸ ፡ ምድር ፤ ይቤ ፡ እግዚአብሔር ። 4 ወኣነሥእ ፡ እዴየ ፡ ላዕለ ፡ ይሁዳ ፡ ወላዕለ ፡ እለ ፡ ይነብሩ ፡ ኤሩሳሌም ፤ ይቤ ፡ እግዚአብሔር ፤ ወእስዕሮሙ ፡ እምዝንቱ ፡ ብሔር ፡ አስማቲሆሙ ፡ ለበዓል ፡ ወአስማተ ፡ ማረይት ። 5 ወእለ ፡ ይሰግዱ ፡ ለከዋክብተ ፡ ሰማይ ፡ በአንሕስት ፡ ወእለ ፡ ይምሕሉ ፡ በስመ ፡ እግዚአብሔር ፡ ንጉሦሙ ። 6 ወእለ ፡ ይትገሐሡ ፡ እምእግዚአብሔር ፡ ወእለ ፡ ኢይትኤዘዙ ፡ ለእግዚአብሔር ። 7 ፍርሁ ፡ እምቅድመ ፡ ገጹ ፡ ለእግዚአብሔር ፡ አምላክ ፤ እስመ ፡ አልጸቀት ፡ ዕለተ ፡ እግዚአብሔር ፤ እስመ ፡ አስተዳለወ ፡ እግዚአብሔር ፡ መሥዋዕቶ ፡ ወቀደሶሙ ፡ ለኅሩያኒሁ ። 8 ወይከውን ፡ በዕለተ ፡ መሥዋዕቱ ፡ ለእግዚአብሔር ፡ ወእትቤቀሎሙ ፡ ለመላእክት ፡ ወለቤተ ፡ ንጉሥ ፡ ወለኵሎሙ ፡ እለ ፡ ይለብሱ ፡ እልባሰ ፡ ነኪር ። 9 ወእትቤቀሎሙ ፡ ለኵሎሙ ፡ ገሃደ ፡ በውስተ ፡ አናቅጽ ፡ ይእተ ፡ አሚረ ፡ እለ ፡ ይመልኡ ፡ ቤተ ፡ እግዚአብሔር ፡ አምላኮሙ ፡ ዐመፃ ፡ ወጽልሑተ ። 10 ወይከውን ፡ ይእተ ፡ ዕለተ ፤ ይቤ ፡ እግዚአብሔር ፤ ወይከውን ፡ ቃለ ፡ አውያት ፡ እምአናቅጽ ፡ ወእምእለ ፡ ይረግዙ ፡ ውውዓ ፡ እምውስጥ ፡ ወቀትል ፡ ዐቢይ ፡ በውስተ ፡ አውግር ። 11 ብክዩ ፡ እለ ፡ ትነብሩ ፡ ውስተ ፡ ቀትል ፤ እስመ ፡ ይመስሉ ፡ ኵሉ ፡ እሕዛበ ፡ ከነአን ፡ ተሠረዉ ፡ ኵሎሙ ፡ እለ ፡ ይትዔበዩ ፡ በወርቅ ። 12 ወይከውን ፡ ይእተ ፡ ዕለተ ፤ ይቤ ፡ እግዚአብሔር ፤ እፈትና ፡ ለኤሩሳሌም ፡ በማኅቶት ፡ ወእትቤቀሎሙ ፡ ለዕደው ፡ እለ ፡ ያስተሐቅሩ ፡ ሕጎሙ ፡ እለ ፡ ይብሉ ፤ ኢያሤኒ ፡ ወኢያሐሥም ፡ እግዚአብሔር ። 13 ወየኀስር ፡ ኀይሎሙ ፡ ወይትበረበር ፡ አብያቲሆሙ ፡ ወኢይነብርዎ ፡ ወይተክሉ ፡ ወይነ ፡ ወኢይሰትይዎ ። 14 እስመ ፡ አልጸቀት ፡ ዕለተ ፡ እግዚአብሔር ፡ ዐባይ ፡ ቀርበት ፡ ወአፍጠነት ፡ ጥቀ ፤ ድምፃ ፡ ለዕለተ ፡ እግዚአብሔር ፡ መራር ፡ ወእኪት ፡ ጽንዕት ፡ ይእቲ ። 15 ዕለተ ፡ መንሱት ፡ ዕለተ ፡ ሕማም ፡ ወምንዳቤ ፡ ዕላተ ፡ ምምዓ ፡ ወሙስና ፡ ዕለተ ፡ ጽልመት ፡ ወቆባር ፡ ዕለተ ፡ ደመና ፡ ወጊሜ ። 16 ዕለተ ፡ ቀርን ፡ <ወ>ውውዓ ፡ ለአህጉር ፡ ጽኑዓት ፡ ወላዕለ ፡ በሓውርት ፡ ልዑላት ። 17 ወኣመነድቦሙ ፡ ለሰብእ ፡ ወየሐውሩ ፡ ከመ ፡ ዕዉራን ፡ እስመ ፡ አበሱ ፡ ለእግዚአብሔር ፤ ወይክዕው ፡ ደሞሙ ፡ ከመ ፡ ጸበል ፡ ወሥጋሆሙ ፡ ከመ ፡ ፅፍዕ ። 18 ወኢያድኅኖሙ ፡ እንከ ፡ ወርቆሙ ፡ ወብሩሮሙ ፡ እምዕለተ ፡ መዐቱ ፡ ለእግዚአብሔር ፤ ወእምእሳተ ፡ ቅንአቱ ፡ ትጠፍእ ፡ ኵላ ፡ ምድር ፤ እስመ ፡ ፍጡነ ፡ ያኀልቆሙ ፡ ለእለ ፡ ይነብሩ ፡ ውስተ ፡ ምድር ።