ዘዘካርያስ ፡ ነቢይ ።

 

 

1    1 በካልእ ፡ ዓመተ ፡ መንግሥቱ ፡ ለዳርዮስ ፡ በሳምን ፡ ወርኅ ፡ ኮነ ፡ ቃለ ፡ እግዚአብሔር ፡ ኀበ ፡ ዘካርያስ ፡ ወልደ ፡ በራኪዩ ፡ ወልደ ፡ ሐዶ ፡ ነቢይ ፡ ወይቤሎ ። 2 ተምዕዐ ፡ እግዚአብሔር ፡ ላዕለ ፡ አበዊክሙ ፡ ዐቢየ ፡ መዐተ ። 3 ወይቤ ፤ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ተመየጡአ ፡ ኀቤየ ፡ ወእትመየጥ ፡ ኀቤክሙ ፤ ይቤ ፡ እግዚአብሔር ፡ ዘኵሎ ፡ ይመልክ ። 4 ኢትኩኑአ ፡ ከመ ፡ አበዊክሙ ፡ እለ ፡ ገሠጽዎሙ ፡ ነቢያት ፡ ቀደምት ፡ ወይቤልዎሙ ፤ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ተመየጡአ ፡ እምፍኖትክሙ ፡ እኩይ ፡ ወእምእከየ ፡ ምግባ<ሪ>ክሙ ፤ ወአበዩ ፡ ሰሚዖትየ ፤ ይቤ ፡ እግዚአብሔር ፡ ዘኵሎ ፡ ይመልክ ። 5 አይቴአ ፡ አበዊክሙ ፡ ወነቢያቲክሙ ፤ ቦኑአ ፡ ለዓለም ፡ የሐይዉ ። 6 ወይእዜኒአ ፡ ተወከፉ ፡ ቃልየ ፡ ወሕግየ ፡ ኵሎ ፡ ዘአዘዝኩ ፡ በነፍስየ ፡ ለአግብርትየ ፡ ለነቢያት ፡ ቀደምት ፡ እለ ፡ ረከብዎሙ ፡ ለአበዊክሙ ፤ ወተሰጥዉ ፡ ወይቤሉ ፤ በከመ ፡ ነበበ ፡ እግዚአብሔር ፡ ዘኵሎ ፡ ይመልክ ፡ ከመ ፡ ይግበር ፡ ላዕሌነ ፡ በከመ ፡ ፍናዊነ ፡ ወበከመ ፡ ጌጋይነ ፡ ከማሁ ፡ ገብረ ፡ ለነ ። 7 ወአሜ ፡ ተስዑ ፡ ለጽልመት ፡ ዐሠርቱ ፡ ወአሐዱ ፡ ወርኅ ፡ በወርኀ ፡ ሳቤጥ ፡ በካልእት ፡ ዓመተ ፡ መንግሥቱ ፡ ለዳርዮስ ፡ ኮነ ፡ ቃለ ፡ እግዚአብሔር ፡ ኀበ ፡ ዘካርያስ ፡ ወልደ ፡ በራኪዩ ፡ ወልደ ፡ ሐዶ ፡ ነቢይ ፡ ወይቤሎ ። 8 ርኢኩ ፡ በሌሊት ፡ ብእሴ ፡ ይጼዐን ፡ ዲበ ፡ ፈረስ ፡ ቀይሕ ፡ ወይቀውም ፡ ማእከለ ፡ ክልኤ ፡ አድባር ፡ ዘቦ ፡ ጽላሎት ፡ ወድኅሬሁ ፡ አፍራስ ፡ ቀይሓን ፡ ወጸሊማን ፡ ወኰሥኰሣን ፡ ወጸዓድው ። 9 ወእቤሎ ፤ ምንትኑ ፡ እሉ ፡ እግዚኦ ፤ ወይቤለኒ ፡ መልአክ ፡ ዘይትናገረኒ ፤ አነ ፡ እነግረከ ፡ ምንት ፡ ውእቱ ፡ ዝንቱ ። 10 ወተሰጥወኒ ፡ ብእሲ ፡ ዘይቀውም ፡ ማእከለ ፡ አድባር ፡ ወይቤለኒ ፤ እሉ ፡ እሙንቱ ፡ እለ ፡ ፈነወ ፡ እግዚአብሔር ፡ ይዑድዋ ፡ ለምድር ። 11 ወተሰጥውዎ ፡ ለመልአከ ፡ እግዚአብሔር ፡ ዘይቀውም ፡ ማእከለ ፡ አድባር ፡ ወይቤሉ ፤ ዖድነ ፡ ኵላ ፡ ምድረ ፡ ወናሁ ፡ ኵላ ፡ ምድር ፡ ትነብር ፡ ወታረምም ። 12 ወተሰጥወ ፡ መልአከ ፡ እግዚአብሔር ፡ ወይቤ ፤ እግዚኦ ፡ ዘኵሎ ፡ ትመልክ ፡ እስከ ፡ ማእዜኑ ፡ ኢትሣሀላ ፡ ለኤሩሳሌም ፡ ወለአህጉረ ፡ ይሁዳ ፡ ዘአስተትከ ፡ እንዘ ፡ ሰብዓ ፡ ዓም ። 13 ወተሰጥዎ ፡ እግዚአብሔር ፡ ለዝኩ ፡ መልአክ ፡ ዘይትናገረኒ ፡ ቃለ ፡ ሠናየ ፡ ወነገረ ፡ ፍሥሓ ። 14 ወይቤለኒ ፡ ዝኩ ፡ መልአክ ፡ ዘይትናገረኒ ፤ ክላሕ ፡ ወበል ፤ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ቀናእኩ ፡ ላዕለ ፡ ኤሩሳሌም ፡ ወላዕለ ፡ ይሁዳ ፡ ዐቢየ ፡ ቅንአተ ። 15 ወተምዐዕኩ ፡ ላዕለ ፡ ሕዝብየ ፡ ዐቢየ ፡ መዐተ ፡ እለ ፡ ተቃወሙ ፡ ሶበ ፡ አነ ፡ ተምዐዕኩ ፡ ኅዳጠ ፡ ወእሙንቱ ፡ ወሰኩ ፡ እኪተ ። 16 በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፤ እትመየጣ ፡ ለኤሩሳሌም ፡ በምሕረት ፡ ወይትሐነጽ ፡ ቤትየ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወእሠርዕ ፡ መሠረታ ፡ ለኤሩሳሌም ፡ ወዓዲ ። 17 ወይቤለኒ ፡ መልአክ ፡ ዘይትናገረኒ ፤ ክላሕ ፡ ወበል ፤ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ዓዲ ፡ ትትከዐው ፡ ሠናይት ፡ ውስተ ፡ አህጉር ፡ ወይሣሀላ ፡ እግዚአብሔር ፡ ለጽዮን ፡ ዓዲ ፡ ወየኀርያ ፡ ለኤሩሳሌም ። 18 ወካዕበ ፡ አንሣእኩ ፡ አዕይንትየ ፡ ወርኢኩ ፡ አርባዕተ ፡ አቅርንተ ። 19 ወእቤሎ ፡ ለዝኩ ፡ መልአክ ፡ ዘይትናገረኒ ፤ ምንትኑ ፡ ዝንቱ ፡ እግዚእየ ፤ ወይቤለኒ ፤ ዝንቱ ፡ አቅርንት ፡ ዘይዘርዎሙ ፡ ለይሁዳ ፡ ወለእስራኤል ። 20 ወካዕበ ፡ አርአየኒ ፡ እግዚአብሔር ፡ አርባዕተ ፡ ጸረብተ ። 21 ወእቤሎ ፤ ምንተ ፡ ይግበሩ ፡ መጽኡ ፡ እሉ ፤ ወይቤለኒ ፤ እስመ ፡ ከፍኡ ፡ እሉ ፡ አቅርንት ፡ እለ ፡ ይዘርውዎሙ ፡ ለይሁዳ ፡ ወለእስራኤል ፡ ወአልቦ ፡ ዘአንሥአ ፡ ርእሶ ፡ እምኔሆሙ ፤ መጽኡ ፡ ያብልኅዎሙ ፡ እሉ ፡ በውስተ ፡ እደዊሆሙ ፤ እሉ ፡ እንከ ፡ አርባዕቱ ፡ አቅርንት ፡ ሕዝብ ፡ እሙንቱ ፡ እለ ፡ አንሥኡ ፡ ቀርኖሙ ፡ ይዝርውዋ ፡ ለምድረ ፡ እግዚአብሔር ።