ኦሪት ፡ ዘመሳፍንት ።

 

 

1    1 ወኮነ ፡ እምድኅረ ፡ ሞተ ፡ ኢየሱስ ፡ ወተስእሉ ፡ ደቂቀ ፡ እስራኤል ፡ [ኀበ ፡ እግዚአብሔር ፡] እንዘ ፡ ይብሉ ፡ መኑ ፡ የዐርግ ፡ ለነ ፡ ኀበ ፡ ከናኔዎን ፡ መልአክ ፡ ዘይትቃተሎሙ ፡ ለነ ። 2 ወይቤሎ[ሙ] ፡ እግዚአብሔር ፡ ይሁዳ ፡ የዐርግ ፡ ወናሁ ፡ አግባእክዋ ፡ ለምድር ፡ ውስተ ፡ እዴሁ ። 3 ወይቤሎ ፡ ይሁዳ ፡ ለስምዖን ፡ እኁሁ ፡ ዕረግ ፡ ምስሌየ ፡ በውስተ ፡ መክፈልትየ ፡ ወንትቃተሎሙ ፡ ለከናአን ፡ ወአሐውር ፡ አነኒ ፡ ምስሌከ ፡ በውስተ ፡ መክፈልትከ ፡ ወሖረ ፡ ስምዖን ፡ ምስሌሁ ። 4 ወዐርገ ፡ ይሁዳ ፡ ወአግብኦሙ ፡ እግዚአብሔር ፡ ለከናኔዎን ፡ ወለፌሬዜዎን ፡ ውስተ ፡ እዴሁ ፡ ወቀተሎሙ ፡ በቤዜቅ ፡ እልፈ ፡ ብእሴ ። 5 ወረከብዎ ፡ ለአዶኒቤዜቅ ፡ ወተቃተልዎ ፡ ወቀተልዎሙ ፡ ለከናኔዎን ፡ ወለፌሬዜዎን ። 6 ወጐየ ፡ አዶኒቤዜቅ ፡ ወዴገንዎ ፡ ወተለውዎ ፡ ወአኀዝዎ ፡ ወመተሩ ፡ አርእስተ ፡ እደዊሁ ፡ ወእገሪሁ ። 7 ወይቤሎሙ ፡ አዶኒቤዜቅ ፡ ዘ፸ነገሥት ፡ አርእስተ ፡ እደዊሆሙ ፡ ወእገሪሆሙ ፡ ምቱር ፡ ሀለወ ፡ አስተጋብኡ ፡ በታሕተ ፡ ማእድየ ፡ ወበከመ ፡ ገበርኩ ፡ ከማሁ ፡ ፈደየኒ ፡ እግዚአብሔር ፡ ወወሰድዎ ፡ ኢየሩሳሌም ፡ ወሞተ ፡ በህየ ። 8 ወተቃተሉ ፡ ደቂቀ ፡ ይሁዳ ፡ ምስለ ፡ ኢየሩሳሌም ፡ ወአስተግብእዋ ፡ ወቀተልዋ ፡ በአፈ ፡ ኀፂን ፡ ወአውዐዩ ፡ ሀገራ ፡ በእሳት ። 9 ወእምዝ ፡ ወረዱ ፡ ደቂቀ ፡ ይሁዳ ፡ ይትቃተልዎሙ ፡ ለከናኔዎን ፡ እለ ፡ ይነብሩ ፡ ውስተ ፡ አድባር ። 10 ወሖረ ፡ ይሁዳ ፡ ውስተ ፡ ከናኔዎን ፡ እለ ፡ ይነብሩ ፡ ውስተ ፡ ኬብሮን ፡ ወወፅኡ ፡ ሰብአ ፡ ኬብሮን ፡ ተቀበልዎሙ ፡ ወስማ ፡ ለኬብሮን ፡ ትካት ፡ ቀሪየርቦቀሴፌር ፡ ወቀተልዎሙ ፡ ለሴሲ ፡ ወለአኪመም ፡ ወለተሚ ፡ ትውልደ ፡ ኤነቅ ። 11 ወሖሩ ፡ እምህየ ፡ ኀበ ፡ እለ ፡ ይነብሩ ፡ ዳቢር ፡ ወስማ ፡ ለዳቢር ፡ ትካት ፡ ሀገረ ፡ መጽሐፍ ። 12 ወይቤ ፡ ካሌብ ፡ ዘቀተላ ፡ ለሀገረ ፡ መጽሐፍ ፡ ወአስተጋብኣ ፡ እሁቦ ፡ አስካ ፡ ወለትየ ፡ ትኩኖ ፡ ብእሲተ ። 13 ወአስተጋብኣ ፡ ጎቶኒየል ፡ ወልደ ፡ ቄኔዝ ፡ እኁሁ ፡ ለካሌብ ፡ ዘይንእስ ፡ ወወሀቦ ፡ አስካ ፡ ወለቶ ፡ ትኩኖ ፡ ብእሲቶ ። 14 ወሶበ ፡ ለሐዊራ ፡ አምከራ ፡ ጎቶኒየል ፡ ትስአሎ ፡ ለአቡሃ ፡ ይጸግዋ ፡ ዐጸደ ፡ ወፍር ፡ ወአንጐርጐረት ፡ በዲበ ፡ አድግ ፡ ወጸርሐት ፡ በላዕለ ፡ አድግ ፡ ወትቤ ፡ ውስተ ፡ ብሔረ ፡ አዜብ ፡ ፈኖከኒ ፡ ወይቤላ ፡ ካሌብ ፡ ምንተ ፡ ኮንኪ ። 15 ወትቤሎ ፡ አስካ ፡ ሀበኒ ፡ በረከተ ፡ እስመ ፡ ብሔረ ፡ አዜብ ፡ ፈኖከኒ ፡ ወሀበኒ ፡ ቤዛ ፡ ማይ ፡ ወወሀባ ፡ ካሌብ ፡ በከመ ፡ ትፈቱ ፡ በልባ ፡ ቤዛ ፡ ሕሙም ፡ ወቤዛ ፡ ትኩዝ ። 16 ወደቂቀ ፡ ዮባብ ፡ ቀኔያዊ ፡ ሐሙሁ ፡ ለሙሴ ፡ ዐርጉ ፡ እምነ ፡ ሀገረ ፡ ፊንቆን ፡ ኀበ ፡ ደቂቀ ፡ ይሁዳ ፡ ውስተ ፡ ሐቅለ ፡ ይሁዳ ፡ ዘመንገለ ፡ አዜብ ፡ ውስተ ፡ ሙራደ ፡ አረድ ፡ ወሖረ ፡ ወነበረ ፡ ምስለ ፡ ሕዝብ ። 17 ወሖረ ፡ ይሁዳ ፡ ምስለ ፡ ስምዖን ፡ [እኁሁ ፡] ወቀተልዎሙ ፡ ለከናኔዎን ፡ እለ ፡ ይነብሩ ፡ ውስተ ፡ ሴፍር ፡ ወአሕረምዋ ፡ ወአጥፍእዋ ። 18 ወኢተወርሳ ፡ ይሁዳ ፡ ለጋዛን ፡ ወለደወላ ፡ ወአስቃሎና ፡ ወደወላ ፡ ወአዛጦን ፡ ወደወላ ፡ ወጺኦታቲሃ ። 19 ወሀለወ ፡ እግዚአብሔር ፡ ምስለ ፡ ይሁዳ ፡ ወተወርሰ ፡ ደብረ ፡ ወስእነ ፡ ተወርሶቶሙ ፡ ለእለ ፡ ይነብሩ ፡ ውስተ ፡ ቈላት ፡ እስመ ፡ ሬከብ ፡ ፈለጣ ። 20 ወወሀብዎ ፡ ለካሌብ ፡ ኬብሮን ፡ በከመ ፡ ይቤ ፡ ሙሴ ፡ ወተወርሰ ፡ እምህየ ፡ አህጉረ ፡ ወአሰሰሎሙ ፡ እምህየ ፡ ለሠለስቱ ፡ ደቂቀ ፡ ኤናቅ ። 21 ወለኢየቡሴዎን ፡ እለ ፡ ይነብሩ ፡ ውስተ ፡ ኢየሩሳሌም ፡ ኢያሰሰልዎሙ ፡ ደቂቀ ፡ ብንያሚ ፡ ወነበሩ ፡ ኢየቡሴዎን ፡ ምስለ ፡ ደቂቀ ፡ ብንያሚ ፡ እስከ ፡ ዛቲ ፡ ዕለት ። 22 ወዐርጉ ፡ ደቂቀ ፡ ዮሴፍሰ ፡ እሙንቱኒ ፡ ውስተ ፡ ቤቴል ፤ 23 ወስማ ፡ ለይእቲ ፡ ሀገር ፡ ትካት ፡ ሉዛ ። 24 ወርእዩ ፡ ሰብአ ፡ መዓቅብ ፡ ብእሴ ፡ እንዘ ፡ ይወፅእ ፡ እምነ ፡ ሀገር ፡ ወአኀዝዎ ፡ ወይቤልዎ ፡ አርእየነ ፡ ምብዋኣ ፡ ለሀገር ፡ ወንገብር ፡ ምስሌከ ፡ ምሕረተ ። 25 ወአርአዮሙ ፡ እንተ ፡ ኀበ ፡ ይበውእዋ ፡ ለሀገር ፡ ወቀተልዋ ፡ ለይእቲ ፡ ሀገር ፡ በአፈ ፡ ኀፂን ፡ ወለዝክቱሰ ፡ ብእሲ ፡ ወለአዝማዲሁ ፡ አግዐዝዎሙ ። 26 ወአተወ ፡ ውእቱ ፡ ብእሲ ፡ ውስተ ፡ ምድረ ፡ ኬጤዎን ፡ ወነደቀ ፡ በህየ ፡ ሀገረ ፡ ወሰመየ ፡ ስማ ፡ ሉዛ ፡ ወውእቱ ፡ ኮነ ፡ ስማ ፡ እስከ ፡ ዮም ። 27 ወኢተወርሰ ፡ ምናሴ ፡ ቤተሳን ፡ እንተ ፡ ሀገረ ፡ ሶቂቶን ፡ ወኢአዋልዲሃ ፡ ወኢጺኦታቲሃ ፡ ወኢኤቅዳአድ ፡ ወኢአዋልዲሃ ፡ ወኢእለ ፡ ይነብሩ ፡ ውስተ ፡ ዶር ፡ ወኢአዋልዲሃ ፡ ወኢእለ ፡ ይነብሩ ፡ [ውስተ] ፡ በለዓም ፡ ወኢአዋልዲ[ሃ] ፡ ወኢእለ ፡ ይነብሩ ፡ ውስተ ፡ መጌዶን ፡ ወኢአዋልዲሃ ፡ ወኢእለ ፡ ይነብሩ ፡ [ውስተ ፡] የብለዓም ፡ ወኢአዋልዲሃ ፡ ወአኀዙ ፡ ከናአን ፡ ይንበሩ ፡ ውስተ ፡ ይእቲ ፡ ምድር ። 28 ወእምዝ ፡ ሶበ ፡ ጸንዑ ፡ እስራኤል ፡ መጸብሔ ፡ ረሰይዎሙ ፡ ለከናአን ፡ ወአጥፍኦሰ ፡ ኢያጥፍእዎሙ ። 29 ወኤፍሬምኒ ፡ ኢያጥፍእዎሙ ፡ ለከናኔዎን ፡ እለ ፡ ይነብሩ ፡ ውስተ ፡ ጋዜር ፡ ወነበሩ ፡ ከናኔዎን ፡ ማእከሎሙ ፡ ውስተ ፡ ጋዜር ፡ ወኮንዎሙ ፡ መጸብሔ ። 30 ወዛቡሎንሂ ፡ ኢያጥፍእዎሙ ፡ ለእለ ፡ ይነብሩ ፡ ውስተ ፡ ቄድሮን ፡ ወለእለ ፡ ይነብሩ ፡ ውስተ ፡ ዐማን ፡ ወነበሩ ፡ ከናኔዎን ፡ ማእከሎሙ ፡ ወኮንዎሙ ፡ መጸብሔ ። 31 ወአሴርሂ ፡ ኢያጥፍእዎሙ ፡ ለእለ ፡ ይነብሩ ፡ ውስተ ፡ አኮ ፡ ወኮንዎሙ ፡ መጸብሔ ፡ ወእለ ፡ ይነብሩ ፡ ውስተ ፡ ደር ፡ ወእለ ፡ ይነብሩ ፡ ውስተ ፡ ሲዶና ፡ ወእለ ፡ ይነብሩ ፡ ውስተ ፡ ዳላፍ ፡ ወአስኮድ ፡ ወኬድያ ፡ ወአፌቅ ፡ ወሮዖብ ። 32 ወነበረ ፡ አሴር ፡ ማእከለ ፡ ከናኔዎን ፡ እለ ፡ ይነብሩ ፡ ውስተ ፡ ይእቲ ፡ ምድር ፡ እስመ ፡ ስእኑ ፡ አጥፍኦቶሙ ። 33 ወንፍታሌምሂ ፡ ኢያጥፍእዎሙ ፡ ለእለ ፡ ይነብሩ ፡ ውስተ ፡ ቤ[ተ ፡] ሳሚስ ፡ ወኢእለ ፡ ይነብሩ ፡ ውስተ ፡ ቤቴኔት ፡ ወነበሩ ፡ እስራኤል ፡ ማእከሎሙ ፡ ለከናኔዎን ፡ እለ ፡ ሀለዉ ፡ ውስተ ፡ ይእቲ ፡ ምድር ፡ ወኮንዎሙ ፡ መጾብሔ ፡ እለ ፡ ይነብሩ ፡ ውስተ ፡ ቤተ ፡ ሳሚስ ፡ ወውስተ ፡ ቤቴኔክ ። 34 ወአጠቅዎሙ ፡ አሞሬዎን ፡ ለደቂቀ ፡ ዳን ፡ በውስተ ፡ ደብር ፡ እስመ ፡ ኢያበውሕዎሙ ፡ ይረዱ ፡ ውስተ ፡ ቈላት ፡ ወአኅዙ ፡ አሞሬዎን ፡ ይንበሩ ፡ ውስተ ፡ ደብረ ፡ መርስኖኖስ ፡ ዘቦ ፡ ውስቴቱ ፡ ድበ ፡ ወቈናጽለ ፡ ወጸንዐት ፡ እዴሁ ፡ ለቤተ ፡ ዮሴፍ ፡ ላዕለ ፡ አሞሬዎን ፡ ወኮንዎሙ ፡ መጸብሔ ። 35 ወደብረ ፡ አሞሬዎን ፡ (ለ)ኢዱሜዎን ፡ ላዕላይ ፡ ዘአቅራቢን ፡ እለ ፡ ውስተ ፡ [ላዕለ ፡] ኰኵሕ ።