ትንቢት ፡ ዘሚክያስ ፡ ነቢይ ።

 

 

1    1 ወኮነ ፡ ቃለ ፡ እግዚአብሔር ፡ ኀበ ፡ ሚክያስ ፡ ወልደ ፡ ሞራት ፡ በመዋዕለ ፡ ኢዮአታም ፡ ወአካዝ ፡ ወሕዝቅያስ ፡ ነገሥተ ፡ ይሁዳ ፡ ዘርእየ ፡ በእንተ ፡ ሰማርያ ፡ ወበእንተ ፡ ኢየሩሳሌም ። 2 ስምዑ ፡ አሕዛብ ፡ ወታጽምእ ፡ ምድር ፡ ወኵሎሙ ፡ እለ ፡ ይነብሩ ፡ ውስቴታ ፡ ወይኩንክሙ ፡ እግዚአብሔር ፡ ሰማዕተክሙ ፤ እግዚአብሔርሰ ፡ ውስተ ፡ ቤተ ፡ መቅደሱ ። 3 ናሁ ፡ እግዚአብሔር ፡ ይወፅእ ፡ እምቤቱ ፡ ወይወርድ ፡ ወይነብር ፡ ዲበ ፡ መልዕልተ ፡ ምድር ፡ 4 ወያንቀለቅሉ ፡ አድባር ፡ በታሕቱ ፡ ወይትመሰው ፡ አውግር ፡ ከመ ፡ ሰምዕ ፡ ዘእምቅድመ ፡ ገጸ ፡ እሳት ፡ ወከመ ፡ ማይ ፡ ዘይውሕዝ ፡ እምአድባር ። 5 ዝንቱ ፡ ኵሉ ፡ ዘይከውን ፡ በእንተ ፡ ኀጢአቱ ፡ ለያዕቆብ ፡ ወበእንተ ፡ ጌጋዮሙ ፡ ለቤተ ፡ እስራኤል ፤ ምንትኑ ፡ ኀጢአቱ ፡ ለያዕቆብ ፡ አኮኑ ፡ ሰማርያ ፡ ወምንትኑ ፡ ጌጋዮሙ ፡ ለቤተ ፡ ይሁዳ ፡ አኮኑ ፡ ኢየሩሳሌም ፤ 6 ወእሬስያ ፡ ለሰማርያ ፡ ከመ ፡ ልገተ ፡ ዐቃቤ ፡ ቀምሕ ፡ በገዳም ፡ ወከመ ፡ ተክለ ፡ ወይን ፡ ወእነሥቶ ፡ ለእበኒሃ ፡ ወአንኅሎ ፡ ወእከሥት ፡ መሠረታቲሃ ፡ 7 ወይሰብሩ ፡ ኵሎ ፡ ግልፎሃ ፡ ወያውዕዩ ፡ በእሳት ፡ ኵሎ ፡ ደነሳ ፡ ወአጠፍእ ፡ ኵሎ ፡ ጣዖታ ፡ እምደነሰ ፡ ዝሙታ ፡ ዘአስተጋብአቶ ፡ ለደነሰ ፡ መሐዛኒሃ ፡ ወተገብረት ። 8 በእንተ ፡ ዝንቱ ፡ ትበኪ ፡ ወትላሑ ፡ ወተሐውር ፡ ዕራቃ ፡ ዘእንበለ ፡ አሣእን ፡ ወትበኪ ፡ ከመ ፡ ከይሲ ፡ ወትላሑ ፡ ከመ ፡ አዋልደ ፡ ሲርኖን ። 9 እስመ ፡ ጸንዐ ፡ መቅሠፍታ ፡ እስመ ፡ መጽአት ፡ እስከ ፡ ይሁዳ ፡ ወበጽሐት ፡ እስከ ፡ አንቀጸ ፡ ሕዝብየ ፡ እስከ ፡ ኢየሩሳሌም ። 10 ኢኬ ፡ ትዜኀሩ ፡ ሰብአ ፡ ጌት ፡ ወኢትሕንጹ ፡ እለ ፡ ውስተ ፡ አቂም ፡ ቤተ ፡ ኀሳርክሙ ፡ ሐመደ ፡ ደዩ ፡ ውስተ ፡ ርእሱ ፡ ለኀሳርክሙ ፡ 11 እንተ ፡ ትነብር ፡ ሠናየ ፡ ውስተ ፡ አህጉሪሃ ፡ ወኢትወፅእ ፡ እንተ ፡ ትነብር ፡ ውስተ ፡ ሰናኦር ፡ ወይበክዩ ፡ ምስሌሃ ፡ አብያት ፡ ዘጎራ ፡ ወይነሥኡ ፡ እምኔክሙ ፡ መቅሠፍተ ፡ ወጻዕረ ። 12 ምንት ፡ ብኪ ፡ ምስለ ፡ ሠናይት ፡ እንተ ፡ ትነብር ፡ ውስተ ፡ ማሕምም ፡ እስመ ፡ ወረደት ፡ እኪት ፡ እምኀበ ፡ እግዚአብሔር ፡ ላዕለ ፡ አናቅጸ ፡ ኢየሩሳሌም ፡ 13 ድምፀ ፡ ሰረገላ ፡ ወአፍራስ ፡ ላዕለ ፡ እንተ ፡ ትነብር ፡ ለኪሶ ፡ መልአከ ፡ ኀጢአታ ፡ ይእቲ ፡ ለወለተ ፡ ጽዮን ፡ እስመ ፡ ላዕሌኪ ፡ ተረክበ ፡ ጣዖተ ፡ እስራኤል ፡ 14 በእንተ ፡ ዘፈነውኪ ፡ ሐዋርያተ ፡ ውስተ ፡ መክፈልተ ፡ ጌት ፡ ከንቶ ፡ ኮኑ ፡ ወዐርቁ ፡ አብያተ ፡ መንግሥተ ፡ እስራኤል ። 15 ወይወስድዎሙ ፡ ለሰብአ ፡ ለኪሶ ፡ ኀበ ፡ መዋርስት ፡ ወይወርስዎሙ ፡ እስከ ፡ ኤዶላም ፡ ወያመጽኡ ፡ ክብራ ፡ ለወለተ ፡ እስራኤል ። 16 ግምዒ ፡ ርእሰኪ ፡ ወተላጸዪ ፡ ላዕለ ፡ ደቂቅኪ ፡ ልሕድ ፡ ወአርሕቢ ፡ ብርሐተኪ ፡ ከመ ፡ ንስር ፡ እስመ ፡ ፄወውዎሙ ፡ እምኀቤኪ  ።