ዘምልክያስ ፡ ነቢይ ።

1    1 ተረፈ ፡ ቃለ ፡ እግዚአብሔር ፡ ላዕለ ፡ እስራኤል ፡ በእደ ፡ መልአኩ ፤ ሐልይዎኬ ፡ በልብከሙ  ። 2 አፍቀርኩክሙ ፤ ይቤ ፡ እግዚአብሔር ፡ ወትቤሉኒ ፡ በበይነ ፡ ምንት ፡ አፍቀርከነ ፡ እግዚኦ ፤ አኮኑአ ፡ ኤሳ ው ፡ እኀሁ ፡ ለያዕቆብ ፤ ይቤ ፡ እግዚአብሔር ፤ ያዕቆብሃ ፡ አፍቀርኩ ። 3 ወዔሳውሃ ፡ ጸላእኩ ፡ ወአማሰንኩ ፡ በሓውርቲሁ ፡ ወመክፈልቶ ፡ ወረሰይክዎ ፡ በድወ ። 4 እስመ ፡ ይቤ ፤ ናሁ ፡ ወድቀት ፡ ኤዶምያስ ፡ ንትመየጥ ፡ ወንሕንጽ ፡ መዝብራ ፤ ከመዝ ፡ ይቤ ፡ እግዚአብሔር ፡ ዘኵ ሎ ፡ ይመልክ ፤ አንትሙአ ፡ ተሐንጹ ፡ ወአነ ፡ እነሥት ፡ ወይሰመይአ ፡ ብሔረ ፡ ዐመፃ ፤ ወይሬእያአ ፡ አዕይንቲክሙ ፡ ሕዝበ ፡ ዘሠርዐ ፡ እግዚአብሔር ፡ እስከ ፡ ለዓለም ። 5 ወትብሉ ፡ አንትሙ ፤ ዐቢይ ፡ እግዚአብሔር ፡ መልዕልተ ፡ በሓውርተ ፡ እስራኤል ። 6 ወልድኒአ ፡ ያከብር ፡ አባሁ ፡ ወገብርኒ ፡ ይፍራህ ፡ እግዚኦ ፤ እመኬ ፡ አቡክሙ ፡ አነ ፡ አይቴኑ ፡ ዘአክበርክሙ ፡ ወእመኒ ፡ እግዚእክሙ ፡ አነ ፡ አይቴ ፡ ዘፈራህክሙኒ ፤ ይቤ ፡ እግዚአብሔር ፡ ዘኵሎ ፡ ይመልክ ፤ እስመ ፡ አንትሙአ ፡ ካህናት ፡ አርኰስክሙ ፡ ስምየ ፡ ወትቤሉኒ ፡ በምንትኑ ፡ አርኰስነ ፡ ስመከ ። 7 እስመ ፡ ወደይክሙ ፡ ውስተ ፡ መሥ ዋዕትየ ፡ ኅብስተ ፡ ርኩስ ፡ ወትቤሉ ፤ ለምንትኑ ፡ አርኰስነ ፡ ስመከ ፤ ናሁ ፡ እስመ ፡ ትቤሉ ፤ ማእደ ፡ እግዚአብሔር ፡ ንዉር ፡ ውእቱ ፡ ወእክሉሂ ፡ ዘሥሩዕ ፡ ውስቴቱ ፡ ምኑን ፡ ውእቱ ። 8 እስመ ፡ ታመጽኡ ፡ ነቋረ ፡ ለመሥዋዕትየ ፡ ወኢኮነ ፡ ሠናየ ፡ ከማሁ ፤ ወእመሂ ፡ አምጻእክሙ ፡ ሐንካሰ ፡ ወድዉየ ፡ ኢኮነ ፡ ሠናየ ፤ ስድ ፡ እስኩ ፡ ለመልአክከ ፡ ለእመ ፡ ይትመጠወከ ፡ ወለእመ ፡ ያደሉ ፡ ለገጽከ ፤ ይቤ ፡ እግዚአብሔር ፡ ዘኵሎ ፡ ይመልክ ። 9 ወይእዜኒ ፡ ተጋነዩ ፡ ለገጸ ፡ እግዚአብሔር ፡ አምላክክሙ ፡ ወሰብሕዎ ፡ ለእግዚአብሔር ፡ ወሰብሕዎ ፡ እስመ ፡ በእዴክሙ ፡ ተገብረ ፡ ዝንቱ ፤ ወትርእዩ ፡ ለእመ ፡ ኣደሉ ፡ ለገጽክሙ ፤ ይቤ ፡ እግዚአብሔር ፡ ዘኵሎ ፡ ይመልክ ። 10 እስመ ፡ በእንቲአክሙ ፡ ተዐጽወ ፡ ኆኅተ ፡ ወኢታንድዱ ፡ መሥዋዕትየ ፡ በከንቱ ፡ ወኢፈቀድክሙ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወኢይትሜጠሙ ፡ መሥዋዕተ ፡ እምእዴክሙ ። 11 እስመ ፡ እምሥራቀ ፡ ፀሐይ ፡ እስከነ ፡ ዐረብ ፡ ይሴባሕ ፡ ስምየ ፡ በውስተ ፡ ኵሉ ፡ አሕዛብ ፡ ወእምኵሉ ፡ በሓውርት ፡ ያመጽኡ ፡ ዕጣነ ፡ ለስምየ ፡ ወመሥዋዕተ ፡ ንጹሐ ፡ ለስምየ ፡ ቅዱስ ፤ እስመ ፡ ዐቢይ ፡ ስምየ ፡ በውስተ ፡ ኵሉ ፡ አሕዛብ ፤ ይቤ ፡ እግዚአብሔር ፡ ዘኵሎ ፡ ይመልክ ። 12 ወአንትሙሰ ፡ ታረኵስዎ ፡ እስመ ፡ ትብሉ ፤ ማእደ ፡ እግዚአብሔር ፡ ንዉር ፡ ውእቱ ፡ ወእክሉሂ ፡ ዘውስቴቱ ፡ ምኑን ፡ ውእቱ ። 13 ወትብሉ ፤ ዝንቱ ፡ እምእኩይ ፡ ሕማም ፡ ውእቱ ፤ ወነፋሕክዎ ፡ ይቤ ፡ እግዚአብሔር ፡ ዘኵሎ ፡ ይመልክ ፤ እስመ ፡ ታበውኡ ፡ ዘሄድክሙ ፡ ወሐንካሰ ፡ ወድዉየ ፡ ውስተ ፡ መሥዋዕትየ ፡ ወእመኒ ፡ አምጻእክሙ ፡ መሥዋዕተ ፡ ኢእትሜጠዎ ፡ እምእዴክሙ ፤ ይቤ ፡ እግዚአብሔር ፡ ዘኵሎ ፡ ይመልክ ። 14 ርጉመ ፡ ለይኩን ፡ ኵሉ ፡ ዘቦ ፡ ውስተ ፡ መራዕይሁ ፡ ተባዕተ ፡ ዘቦ ፡ ብፅዓተ ፡ እንዘ ፡ ይትከሀሎ ፡ ይሠውዕ ፡ ለእግዚአብሔር ፡ ዘቦ ፡ ነውሪ ፤ እስመ ፡ ዐቢይ ፡ ንጉሥ ፡ አነ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወይሰማዕ ፡ ስምየ ፡ በውስተ ፡ ኵሉ ፡ አሕዛብ ።