ዘኢዩኤል ፡ ነቢይ ።

1    1 ቃለ ፡ እግዚአብሔር ፡ ዘኮነ ፡ ኀበ ፡ ኢዩኤል ፡ ወልደ ፡ ባቱኤል ። 2 ስምዑ ፡ ዘንተ ፡ ሊቃውንት ፡ ወአፅምኡ ፡ ኵልክሙ ፡ እለ ፡ ትነብሩ ፡ ውስተ ፡ ምድር ፡ ለእመ ፡ ከዊነ ፡ ኮነ ፡ ከመዝ ፡ በመዋዕሊክሙ ፡ ወበመዋዕለ ፡ አበዊክሙ ፡ 3 ከመ ፡ ትንግሩ ፡ ለደቂቅክሙ ፡ ወደቂቅክሙ ፡ ለደቂቆሙ ፡ ወደቂቆሙኒ ፡ ለካልእ ፡ ትውልድ ። 4 ዘአትረፈ ፡ ዕፄ ፡ በልዐ ፡ አንበጣ ፡ ወዘአትረፈ ፡ አንበጣ ፡ በልዐ ፡ ደገቢያ ፡ ወዘአትረፈ ፡ ደገቢያ ፡ በልዐ ፡ አናኳዕ ። 5 ንዝሁ ፡ እለ ፡ ትሰትዩ ፡ ወይነ ፤ ብክዩ ፡ ወላሕዉ ፡ ኵልክሙ ፡ እለ ፡ ትሰትይዎ ፡ ለወይን ፡ ለስካር ፡ እስመ ፡ ተስዕረ ፡ ሐሤት ፡ ወፍሥሓ ፡ እምአፉክሙ ። 6 እስመ ፡ ዐርጉ ፡ አሕዛብ ፡ ውስተ ፡ ምድርክሙ ፡ ጽኑዓን ፡ ወአልቦሙ ፡ ኍልቈ ፤ ስነኒሆሙ ፡ ስነነ ፡ አናብስት ፡ ወኵርናቲሆሙ ፡ ዘእጓለ ፡ አናብስት ። 7 ረሰይዎ ፡ ምድረ ፡ ለወይንየ ፡ ወሰበሩ ፡ በለስየ ፡ ወኀሠሡ ፡ ወፈተኑ ፡ ወገደፉ ፡ በዘ ፡ አጻዕደወት ፡ አዕጹቂሃ ። 8 ብኪ ፡ ሊተ ፡ በእንተ ፡ መርዓት ፡ እንተ ፡ ቀነተት ፡ ሠቀ ፡ በእንተ ፡ ምታ ፡ ዘድንግልናሃ ። 9 ተስዕረ ፡ መሥዋዕት ፡ ወሞጻሕት ፡ በቤተ ፡ እግዚአብሔር ፤ ላሕዉ ፡ ካህናት ፡ እለ ፡ ትገብሩ ፡ መሥዋዕተ ፡ 10 እስመ ፡ ኀስ ረ ፡ ገራውህ ፡ ወትላሑ ፡ ምድር ፡ እስመ ፡ ኀስረ ፡ እክል ፡ ወየብሰ ፡ ወይን ፡ ወጠፍአ ፡ ዘይት ፡ 11 ወተኀፈሩ ፡ ሐረስት ፡ ወበከዩ ፡ ዐቀብተ ፡ ወይን ፡ በእንተ ፡ ሥርናይ ፡ወሰገም ፡ እስመ ፡ ጠፍአ ፡ ማእረር ፡ እምገራውህ ፡ 12 ወየብሰ ፡ ወይን ፡ ወኀልቀ ፡ በለስ ፡ ወሮማን ፡ ወተመርት ፡ ወኮል ፡ ወኵለ ፡ አቅማሐ ፡ ገዳም ፡ የብሰ ፡ ወተኀፈረ ፡ ፍሥሓሆሙ ፡ ለደቂቀ ፡ እጓለ ፡ እመሕያው ። 13 ላሕዉ ፡ ወቅንቱ ፡ ሠቀ ፡ ካህናት ፡ ወብክዩ ፡ እለ ፡ ትሠውዑ ፡ መሥዋዕተ ፤ሖሩ ፡ስክቡ ፡ ውስተ ፡ ሠቅ ፡ እለ ፡ ትሠውዑ ፡ ለእግዚአብሔር ፡ እስመ ፡ ኀልቀ ፡ መሥዋዕት ፡ ወሞጻሕት ፡ እምቤተ ፡እግዚአብሔር ። 14 ቀድሱ ፡ ጾመ ፡ ወስብኩ ፡ ምህልላ ፡ ወአስተጋብኡ ፡ ሊቃናተ ፤ ኵሉ ፡ ዘይነብር ፡ ውስተ ፡ ምድር ፡ ውስተ ፡ ቤተ ፡ አምላክነ ፡ ወጽርኁ ፡ ኀበ ፡ እግዚአብሔር ፡ ኅቡረ ፡ 15 አሌሊተ ፡ አሌሊተ ፡ ይእተ ፡ ዕለተ ፡ እስመ ፡ አልጸቀት ፡ዕለተ ፡ እግዚአብሔር ፡ ወከመዝ ፡ እምነ ፡ መቅሠፍት ፡ ውስተ ፡ መቅሠፍት ፡ ይመጽእ ፡ 16 በቅድመ ፡ አዕይንቲክሙ ፡ ወይጠፍእ ፡ እክል ፡ እምቤተ ፡ አምላክክሙ ፡ ወፍሥሓ ፡ ወሐሤት ፡ 17 በውስተ ፡እጐልት ፡ ጠፍኡ ፡ ሕዝአቶን ፡ መዛግብት ፡ ወተነሥቱ ፡ ምክያዳት ፡ እስመ ፡ የብሰ ፡ እክል ። 18 ምንተ ፡ እንከ ፡ ንሠይም ፡ ለነ ፡ በከዩ ፡ አዕጻደ ፡ ላህም ፡ እስመ ፡ ኀልቀ ፡ መርዔቶሙ ፡ ወጠፍአ ፡ መራዕየ ፡ አባግዕ ። 19 ኀቤከ ፡ እግዚኦ ፡ እጸርኅ ፡ እስመ ፡ እሳት ፡ አኅለቀ ፡ ሥነ ፡ ገዳም ፡ ወነበልባል ፡ አውዐየ ፡ ዕፀ ፡ አዕዋም ፡ 20 ወአንቃዕደወ ፡ ኀቤከ ፡ እንስሳ ፡ ሐቅል ፡ እስመ ፡ የብሰ ፡ አንቅዕተ ፡ ማያት ፡ ወበልዐት ፡ እሳት ፡ሥነ ፡ ገዳም ።