ተረፈ ፡ ነገር ፡ ዘባሮክ ፡

ዘኢኮነ ፡ ኅቡአ ፡ ዘአመ ፡ ይፄወዉ ፡ ባቢሎን ።

 

    ወኮነ ፡ ሶበ ፡ ፄወዎሙ ፡ ለደቂቀ ፡ እስራኤል ፡ ንጉሠ ፡ ከላዴዎን ፡ ነበቦ ፡ እግዚአብሔር ፡ ለኤርምያስ ፡ ወይቤሎ ፡ ኤርምያስ ፡ ኅሩይየ ፡ ተንሥእ ፡ ወፃእ ፡ እምዛቲ ፡ ሀገር ፡ አንተ ፡ ወባሮክ ፡ እስመ ፡ ሀሎኩ ፡ ኣማስና ፡ እምብዝኀ ፡ ኀጢአቶሙ ፡ ለእለ ፡ ይነብሩ ፡ ውስቴታ ፤ እስመ ፡ ጸሎትከኒ ፡ ከመ ፡ ዐምድ ፡ ጽኑዕ ፡ በማእከለ ፡ ሀገር ፡ ወከመ ፡ ቅጽር ፡ ዘአድማስ ፡ ዐውዳ ፤ ወይእዜኒ ፡ ተንሥኡ ፡ ወሖሩ ፡ ወፃኡ ፡ ዘእንበለ ፡ ይምጻእ ፡ ኀይለ ፡ ከላዴዎን ፡ ወይዑዳ ፡ ለሀገር ። ወነበበ ፡ ኤርምያስ ፡ እንዘ ፡ ይብል ፡ ኣስተበቍዐከ ፡ እግዚእየ ፡ አዝዞ ፡ ለገብርከ ፡ ከመ ፡ ይትናገር ፡ ቅድሜከ ፡ ወይቤሎ ፡ እግዚአብሔር ፡ ንብብ ፡ ኅሩይየ ፡ ኤርምያስ ። ወነበበ ፡ ኤርምያስ ፡ ወይቤ ፡ እግዚኦ ፡ ዘኵሎ ፡ ትእኅዝ ፡ ትሜጡኑ ፡ ዛተ ፡ ሀገረ ፡ ኅሪተ ፡ ውስተ ፡ እዴሆሙ ፡ ለከላዴዎን ፡ ከመ ፡ ይዘኀር ፡ ንጉሥ ፡ ምስለ ፡ ሕዘቢሁ ፡ ወይበል ፡ ተኀየልኩ ፡ ወእተ ፡ ሀገረ ፡ ዘአምላክ ፤ ሓሰ ፡ እግዚኦ ፡ እመሰ ፡ ፈቀድከ ፡ ውእቱ ፡ በእዴከ ፡ ታማስና ። ወይቤሎ ፡ እግዚእ ፡ ለኤርምያስ ፡ እስመ ፡ ኅሩይየ ፡ አንተ ፡ ተንሥእ ፡ ወፃኡ ፡ አንተ ፡ ወባሮክ ፡ እስመ ፡ ሀሎኩ ፡ ኣማስና ፡ በኀጢአቶሙ ፡ ለእለ ፡ ይነብሩ ፡ ውስቴታ ፤ ወኢንጉሥ ፡ ወኢኀይለ ፡ ዚአሁ ፡ ኢይክል ፡ በዊአ ፡ ውስተ ፡ ሀገር ፡ ለእመ ፡ አነ ፡ ኢቀደምኩ ፡ ወኢያርኀውኩ ፡ አናቅጺሃ ፤ ተንሥእ ፡ ይእዜኒ ፡ ወሖር ፡ ኀበ ፡ ባሮክ ፡ ወዜንዎ ፡ ዘንተ ፡ ነገረ ፤ ወተንሢአክሙ ፡ ሶበ ፡ ኮነ ፡ ስድስቱ ፡ ሰዓት ፡ ዘሌሊት ፡ ንዑ ፡ ውስተ ፡ ቅጽረ ፡ ሀገር ፡ ወአነ ፡ ኣርእየክሙ ፡ ወለእመ ፡ አነ ፡ ኢቀደምኩ ፡ አማስኖታ ፡ ለሀገር ፡ ኢይክሉ ፡ በዊኦታ ። ወዘንተ ፡ ብሂሎ ፡ እግዚእ ፡ ኀለፈ ፡ እምኀበ ፡ ኤርምያስ ። ወኤርምያስ ፡ ሶቤሃ ፡ ሠጠጠ ፡ አልባሲሁ ፡ ወወደየ ፡ ሐመደ ፡ ዲበ ፡ ርእሱ ፡ ወቦአ ፡ ውስተ ፡ ቤተ ፡ መቅደስ ። ወርእዮ ፡ ባሮክ ፡ ለኤርምያስ ፡ እንዘ ፡ ምሉእ ፡ መሬተ ፡ ዲበ ፡ ርእሱ ፡ ወአልባሲሁኒ ፡ ሥጡጥ ፡ ጸርኀ ፡ በዐቢይ ፡ ቃል ፡ እንዘ ፡ ይብል ፡ አቡየ ፡ ኤርምያስ ፡ ምንተ ፡ ኮንከ ፡ ወአየ ፡ ኀጢአተ ፡ ገብሩ ፡ ሕዝብ ። እስመ ፡ ሶበ ፡ ይኤብሱ ፡ ሕዝብ ፡ የሐዝን ፡ ኤርምያስ ፡ ወይወዲ ፡ ሐመደ ፡ ዲበ ፡ ርእሱ ፡ ወይጼሊ ፡ በእንተ ፡ ሕዝብ ፡ እስከ ፡ ይትኀደግ ፡ ሎሙ ፡ አበሳሆሙ ፡ ለሕዝብ ። ወተስእሎ ፡ ባሮክ ፡ እንዘ ፡ ይብል ፡ አቡየ ፡ ኤርምያስ ፡ ምንተ ፡ ኮንከ ፡ ወምንተ ፡ ኮኑ ፡ ሕዝብ ። ወይቤሎ ፡ ኤርምያስ ፡ ዕቀብ ፡ ከመ ፡ ኢንሥጥጥ ፡ አልባሲነ ፡ አላ ፡ ንሥጥጥ ፡ አልባቢነ ፡ ወኢ ፡ ንደይ ፡ ማየ ፡ ውስተ ፡ ምዕቃላት ፡ ከመ ፡ ንብኪ ፡ ርቱዐ ፡ እስከ ፡ ንመልኦሙ ፡ አንብዐ ፡ እስመ ፡ እምይእዜ ፡ ኢይምሐርዎ ፡ ለዝ ፡ ሕዝብ ። ወይቤ ፡ ባሮክ ፡ አቡየ ፡ ኤርምያስ ፡ ምንተ ፡ ኮንከ ፤ ወይቤሎ ፡ ኤርምያስ ፡ እስመ ፡ አምላክ ፡ ይሜጥዋ ፡ ለሀገር ፡ ውስተ ፡ እዴሁ ፡ ለንጉሠ ፡ ከላዴዎን ፡ እስመ ፡ ይፄውዎሙ ፡ ለሕዝብ ፡ በእኪት ። ወሰሚዖ ፡ ዘንተ ፡ ኵሎ ፡ ባሮክ ፡ ሠጠጠ ፡ አልባሲሁ ፡ ወይቤ ፡ አቡየ ፡ ኤርምያስ ፡ ምንተ ፡ ለአኩ ፡ ለከ ። ወይቤሎ ፡ ኤርምያስ ፡ ጽናሕ ፡ ምስሌየ ፡ እስከ ፡ ስድስቱ ፡ ሰዐት ፡ ዘሌሊት ፡ ከመ ፡ ታእምር ፡ ዘአማን ፡ ነገር ። ወነበሩ ፡ ቤተ ፡ መቅደስ ፡ እንዘ ፡ ይበክዩ ። ወሶበ ፡ ኮነ ፡ ስድስቱ ፡ ሰዐት ፡ ዘሌሊት ፡ ዘይቤሎ ፡ እግዚእ ፡ ለኤርምያስ ፡ ከመ ፡ ይፃእ ፡ ምስለ ፡ ባሮክ ፡ ወበጽሑ ፡ ውስተ ፡ ቅጽረ ፡ ሀገር ፡ ወነበሩ ፡ እንዘ ፡ ይጸንሑ ። ወኮነ ፡ ቃለ ፡ ቀርን ፡ ወወፅኡ ፡ መላእክት ፡ እምሰማይ ፡ ወበእደዊሆሙ ፡ ይጸውሩ ፡ ብርሃናተ ፡ እሰት ፡ ወቆሙ ፡ ውስተ ፡ ቅጽረ ፡ ሀገር ። ወሶቤሃ ፡ ኤርምያስ ፡ ወባሮክ ፡ በከዩ ፡ እንዘ ፡ ይብሉ ፡ እስመ ፡ ይእዜ ፡ አእመርነ ፡ ከመ ፡ አማን ፡ ነገር ። ወአስተብቍዖሙ ፡ ኤርምያስ ፡ ለመላእክት ፡ እንዘ ፡ ይብል ፡ ኣስተበቍዐክሙ ፡ ኵሎ ፡ ኢታህጕሉ ፡ ሀገረ ፡ እስከ ፡ እስእሎ ፡ ለእግዚአብሔር ፡ አሐተ ፡ ነገረ ፤ ወነበቦሙ ፡ እግዚእ ፡ ለመላእክት ፡ እንዘ ፡ ይብል ፡ ኢታህጕሉ ፡ ሀገረ ፡ እስከ ፡ እትናገር ፡ ምስለ ፡ ኤርምያስ ፡ ኅሩይየ ። ወሶቤሃ ፡ ተናገረ ፡ ኤርምያስ ፡ እንዘ ፡ ይብል ፡ ኣስተበቍዐከ ፡ እግዚእየ ፡ አዝዝ ፡ ሊተ ፡ ከመ ፡ አትናገር ፡ ምስሌከ ፤ ወይቤሎ ፡ ንብብ ፡ ኅሩይየ ፡ ኤርምያስ ፡ ዘትፈቅድ ። ወይቤሎ ፡ ኤርምያስ ፡ ናሁ ፡ ይእዜ ፡ አእመርነ ። እግዚእየ ፡ ከመ ፡ ትሜጥዋ ፡ ለሀገር ፡ ውስተ ፡ እደ ፡ ጸላእታ ፡ ወይነሥኣ ፡ ሕዝብ ፡ ዘእምባቢሎን ፤ ወምንተ ፡ ትፈቅድ ፡ ከመ ፡ እግበር ፡ ቅድስተ ፡ ቅኔነ ፡ በኅቡእ ፡ ዘንትቀነይ ፡ ወምንተ ፡ ትፈቅድ ፡ እግበር ፡ ዲቤሆሙ ። ወይቤሎ ፡ እግዚእ ፡ ንሥኦሙ ፡ ወመጥዋ ፡ ለምድር ፡ ወለቤተ ፡ መቅደስ ፡ እንዘ ፡ ትብል ፡ ወአንቲኒ ፡ ምድር ፡ ስምዒ ፡ ቃለ ፡ ፈጣሪኪ ፡ ዘፈጠረኪ ፡ በኀይለ ፡ ማያት ፡ ዘኀተመኪ ፡ በ፯ማኅተምት ፡ ተመጠዊ ፡ ሥነኪ ፡ ወዕቀቢ ፡ ንዋየ ፡ ቅኔኪ ፡ እስከ ፡ ምጽአቱ ፡ ለፍቁር ። ወነበበ ፡ ኤርምያስ ፡ ወይቤ ፡ ኣስተበቅውዐከ ፡ እግዚእየ ፡ አርእየኒ ፡ ዘእገብር ፡ ለአቤሜሌክ ፡ ኢትዮጵያዊ ፡ ዘውእቱ ፡ ብዙኀ ፡ ዐቀቦሙ ፡ ለሕዝብ ፡ ወለገብርከኒ ፡ ኤርምያስ ፡ ፈድፋደ ፡ እምኵሉ ፡ ሰብአ ፡ ሀገር ፡ ወውእቱ ፡ አውፅአኒ ፡ እምውስተ ፡ ዐዘቅተ ፡ ዐምዐም ፡ ወኢይፈቅድ ፡ ሎቱ ፡ ይርአይ ፡ ሙስናሃ ፡ ወሀጕላ ፡ ለሀገር ፡ ከመ ፡ ኢይሕዘን ። ወይቤሎ ፡ እግዚእ ፡ ለኤርምያስ ፡ ፈንዎ ፡ ውስተ ፡ ዐጸደ ፡ ወይን ፡ ዘሀግሪጳስ ፡ በፍኖት ፡ ዘደብር ፡ ወአነ ፡ እከድኖ ፡ እስከ ፡ ኣገብኦሙ ፡ ለሕዝብ ፡ ውስተ ፡ ሀገር ፤ ወአንተ ፡ ኤርምያስ ፡ ሖር ፡ ምስለ ፡ ሕዝብ ፡ እስከ ፡ ትበጽሑ ፡ ምድረ ፡ ባቢሎን ፡ ወንበር ፡ ትትኔበይ ፡ ሎሙ ፡ እስከ ፡ ኣገብኦሙ ፡ ውስተ ፡ ሀገሮሙ ፤ ወለባሮክሂ ፡ ኅድጎ ፡ ህየ ፡ ውስተ ፡ ኢየሩሳሌም ። ወነገሮ ፡ እግዚእ ፡ ዘንተ ፡ ኵሎ ፡ ለኤርምያስ ፡ ወኀለፈ ፡ እምኀበ ፡ ኤርምያስ ፡ ውስተ ፡ ሰማይ ። ወኤርምያስ ፡ ወባሮክ ፡ ቦኡ ፡ ውስተ ፡ ቤተ ፡ መቅደስ ፡ ወኵሎ ፡ ንዋየ ፡ ዘቅኔሆሙ ፡ መጠውዋ ፡ ለምድር ፡ በከመ ፡ አዘዞሙ ፡ እግዚእ ፡ ወሶቤሃ ፡ ሠረበቶ ፡ ምድር ፡ ወነበሩ ፡ ክልኤሆሙ ፡ ወበከዩ ። ወበሳኒታ ፡ ጸቢሖ ፡ ፈነዎ ፡ ኤርምያስ ፡ ለአቤሜሌክ ፡ እንዘ ፡ ይብል ፡ ንሣእ ፡ ከረቦ ፡ ወሖር ፡ እንተ ፡ ፍኖተ ፡ ደብር ፡ ውስተ ፡ ዐጸደ ፡ ወይን ፡ ዘሀግሪጳስ ፡ ወአምጽእ ፡ ንስቲተ ፡ በለሰ ፡ ለድውያን ፡ ሕዝብ ፡ እስመ ፡ ትፍሥሕተ ፡ እግዚእ ፡ ሀሎ ፡ ውስተ ፡ ርእስከ ፡ ወስብሐቱ ፤ ወሖረ ፡ ውእቱኒ ፡ በከመ ፡ አዘዞ ። ወበሳኒታ ፡ ጸቢሖ ፡ ኀይለ ፡ ከላዴዎን ፡ ዖድዋ ፡ ለሀገር ፡ ወነፍኀ ፡ በቀርን ፡ ዐቢይ ፡ መልአክ ፡ ወይቤ ፡ ውእቱ ፡ ባኡ ፡ ኀይለ ፡ ከላዴዎን ፡ ናሁ ፡ ይትረኀው ፡ ለክሙ ፡ አናቅጽ ። ወሶቤሃ ፡ ቦአ ፡ ንጉሥ ፡ ምስለ ፡ ሰራዊቱ ፡ ወፄወዉ ፡ ኵሎ ፡ ሕዝበ ። ወሶቤሃ ፡ ኤርምያስ ፡ ነሥአ ፡ መራኁተ ፡ ዘቤተ ፡ መቅደስ ፡ ወወፅአ ፡ አፍኣ ፡ እምሀገር ፡ ወወገሮ ፡ ለዝንቱ ፡ መራኁት ፡ ቅድመ ፡ ፀሓይ ፡ እንዘ ፡ ይብል ፡ ለከ ፡ እብለከ ፡ ፀሓይ ፡ ንሣእ ፡ መራኁተ ፡ ዘቤተ ፡ አምላክ ፡ ወዕቀቦሙ ፡ እስከ ፡ መዋዕል ፡ ዘይሴአለከ ፡ እግዚአብሔር ፡ በእንቲአሁ ፤ እስመ ፡ ለነ ፡ ኢኮነ ፡ ድልወተ ፡ ልደትነ ፡ ለዐቂቦቱ ፡ እስመ ፡ ተረከብነ ፡ ንሕነሰ ፡ እንዘ ፡ ነሐፅና ፡ ለኀጢአትነ ። ወእንዘ ፡ ይበኪ ፡ ኤርምያስ ፡ ለሕዝብ ፡ አውፅእዎ ፡ እንዘ ፡ ያቴክልዎ ፡ ወነድእዎ ፡ ምስለ ፡ ሕዝብ ፡ እስከ ፡ ባቢሎን ። ወባሮክሰ ፡ ነሥአ ፡ ሐመደ ፡ ወወደየ ፡ ውስተ ፡ ርእሱ ፡ ወነበረ ፡ ወአስቆቀወ ፡ ዘንተ ፡ ሰቆታወ ፡ ወይቤ ፡ በእንተ ፡ ምንት ፡ ማሰነት ፡ ኢየሩሳሌም ፡ አላ ፡ በእንተ ፡ ኀጢአቱ ፡ ለፍቁር ፡ ሕዝብ ፡ ወተውህበት ፡ በእደ ፡ ጸላኢሃ ፡ በእንተ ፡ ኀጢአትነ ፡ ወዘሕዝብ ፤ አላ ፡ ከመ ፡ ኢይዘኀሩ ፡ ኃጥኣን ፡ ወኢይበሉ ፡ ክህልነ ፡ ነሣኦታ ፡ ለሀገረ ፡ አምላክ ፡ በኀይልነ ፡ ኢኮነ ፡ በጽንዕክሙ ፡ ዘክህልክምዋ ፡ አላ ፡ በኀጥአትነ ፡ ተውሀበት ፡ ለክሙ ፤ ወአምላክነ ፡ ይምሕረነ ፡ ወያገብአነ ፡ ውስተ ፡ ሀገርነ ፡ ወለክሙሰ ፡ ሕይወት ፡ አልቦ ፤ ብፁዓን ፡ እሙንቱ ፡ አበዊነ ፡ አብርሃም ፡ ወይስሐቅ ፡ ወያዕቆብ ፡ እስመ ፡ ወፅኡ ፡ እምዝ ፡ ዓለም ፡ ወኢርእዩ ፡ ሙስናሃ ፡ ለዛቲ ፡ ሀገር ። ወእምድኅረ ፡ ዘንተ ፡ ተናገረ ፡ ወፅአ ፡ እንዘ ፡ ይበኪ ፡ ወይቤ ፡ አሐዝን ፡ በእንቲአኪ ፡ ኢየሩሳሌም ፡ ወወፅአ ፡ እምሀገር ፡ ወኀደረ ፡ ውስተ ፡ መቃብር ፡ ወይመጽኡ ፡ መላእክት ፡ ወይዜንውዎ ፡ በእንተ ፡ ኵሉ ።

    ወአቤሜሌክኒ ፡ አምጽአ ፡ በለሰ ፡ ጊዜ ፡ ቀትር ፡ እምኀበ ፡ ለአኮ ፡ ኤርምያስ ፡ ወረከበ ፡ ዕፀ ፡ ጸፍቅተ ፡ ወነበረ ፡ ወአጽለለ ፡ ከመ ፡ ያዕርፍ ፡ ንስቲተ ፡ ወአስመከ ፡ ርእሶ ፡ ዲበ ፡ ሙዳየ ፡ በለስ ፡ ወኖመ ፡ ስሳ ፡ ውስድስተ ፡ ዓመተ ፡ ወኢነቅሀ ፡ እምንዋሙ ። ወእምድኅረዝ ፡ መዋዕል ፡ ተንሥአ ፡ ወነቅሀ ፡ እምንዋሙ ፡ ወይቤ ፡ ዓዲ ፡ ሶበ ፡ ኖምኩ ፡ ንስቲተ ፡ እስመ ፡ ዓዲ ፡ ይከብደኒ ፡ ርእስየ ፡ ወኢጥዲኩ ፡ ንዋመ ። ወከሠተ ፡ ዝኰ ፡ ሙዳየ ፡ በለስ ፡ ወረክበ ፡ ዝኰ ፡ በለሰ ፡ ሐዲሳነ ፡ ወያንጸፈጽፍ ፡ ሐሊቦን ። ወፈቀደ ፡ ይኑም ፡ ዳግመ ፡ እስመ ፡ ይከብዶ ፡ ርእሱ ፡ ወኢጥዕየ ፡ ድቃስ ፤ ወይቤ ፡ እፈረህ ፡ ከመ ፡ ኢይኑም ፡ ወኢይጐንዲ ፡ ከመ ፡ ኢይሒሰኒ ፡ አቡየ ፡ ኤርምያስ ፡ እስመ ፡ ጽሂቆ ፡ ፈንወኒ ፡ በነግህ ፤ ወይእዜኒ ፡ እትንሣእ ፡ ወአሐውር ፡ እስመ ፡ ሞቀሰ ፡ ዋዕይ ፡ ወአልቦ ፡ ሶበ ፡ የኀድግ ፡ በኵለሄ ። ወተንሥአ ፡ ወንሥአ ፡ ሙዳየ ፡ በለሱ ፡ ወቦአ ፡ ውስተ ፡ ሀገረ ፡ ኢየሩሳሌም ፡ ወኢያእመረ ፡ ሀገረ ፡ ወኢቤቶ ፡ ወይቤ ፡ ቡሩክ ፡ አንተ ፡ እግዚኦ ፡ እስመ ፡ ዐቢይ ፡ ድንጋፄ ፡ ወረደ ፡ ላዕሌሁ ። ወይቤ ፡ አኮኑ ፡ ዛቲ ፡ ይእቲ ፡ ሀገረ ፡ ኢየሩሳሌም ፤ ዮጊ ፡ እጌጊ ፡ እስመ ፡ እንተ ፡ ፍኖተ ፡ ደብር ፡ መጻእኩ ፤ ወእመ ፡ አኮ ፡ እስመ ፡ ይከብደኒ ፡ ርእስየ ፡ ወኢጥዒኩ ፡ ንዋመ ፡ ወይዘነግዐኒ ፡ ልብየ ፤ ወእፎ ፡ እዜኑ ፡ ዘንተ ፡ ነገረ ፡ በኀበ ፡ ኤርምያስ ፡ ዘከመ ፡ ተባዐደተኒ ፡ ሀገር ። ወኀሠሠ ፡ ኵሎ ፡ ትእምርተ ፡ ዘሀሎ ፡ ውስተ ፡ ሀገር ፡ ከመ ፡ ያእምር ፡ ለእመኑ ፡ ኢየሩሳሌም ፡ ይእቲ ። ወገብአ ፡ ካዕበ ፡ ውስተ ፡ ሀገር ፡ ወኀሠሠ ፡ ለእመቦ ፡ ዘያአምሮ ፡ ወኀጥአ ። ወይቤ ፡ ቡሩክ ፡ አንተ ፡ እግዚኦ ፡ እስመ ፡ ዐቢይ ፡ ድንጋፄ ፡ ወድቀ ፡ ላዕሌየ ፤ ወወፅአ ፡ ካዕበ ፡ እምሀገር ፡ ርሑቀ ፡ ወነበረ ፡ እንዘ ፡ የሐዝን ፡ ወእንዘ ፡ ኀበ ፡ የሐውር ፡ ኢያአምር ። ወአንበረ ፡ ዝክወ ፡ ሙዳየ ፡ በለስ ፡ ወይቤ ፡ እነብር ፡ ዝየ ፡ እስከ ፡ ያአትት ፡ እግዚአብሔር ፡ ዘንተ ፡ ህየተ ፡ እምላዕሌየ ። ወእምድኅረዝ ፡ ንቢሮ ፡ ርእየ ፡ ብእሴ ፡ ልሂቀ ፡ የአቱ ፡ እምሐቅል ፡ ወይቤሎ ፡ አቤሜሌክ ፡ ለከ ፡ እብለከ ፡ አንተ ፡ ልሂቅ ፡ አይቴ ፡ ይእቲ ፡ ዛቲ ፡ ሀገር ፡ ወይቤሎ ፡ አረጋይ ፡ ኢየሩሳሌም ፡ ይእቲ ። ወይቤሎ ፡ አቤሜሌክ ፡ አይቴ ፡ ሀሎ ፡ ኤርምያስ ፡ ካህን ፡ ወባሮክ ፡ ሌዋዊ ፡ ወኵሉ ፡ ሕዝበዝ ፡ ሀገር ፡ እስመ ፡ አልቦ ፡ ዘረክብኩ ። ወይቤሎ ፡ አረጋይ ፡ አኮኑ ፡ እምዛቲ ፡ ሀገር ፡ አንተ ፤ ወይእዜኒመ ፡ ትዜከሮ ፡ ለኤርምያስ ፡ ከመ ፡ ትስአል ፡ በእንቲአሁ ፡ ዘንተ ፡ ኵሎ ፡ መዋዕለ ፡ ነቢረከ ፤ ኤርምያስሰኬ ፡ ውስተ ፡ ባቢሎን ፡ ሀሎ ፡ ምስለ ፡ ሕዝብ ፡ እስመ ፡ ተፄወወ ፡ ወተውህበ ፡ ውስተ ፡ እዴሁ ፡ ለናቡከደነጾር ፡ ንጉሠ ፡ ፋርስ ፡ ወሖረ ፡ ህየ ፡ ከመ ፡ ይትነበይ ፡ ሎሙ ። ወአሜሃ ፡ ሰምዐ ፡ አቤሜሌክ ፡ እምኀበ ፡ ውእቱ ፡ አረጋይ ፡ ወይቤሎ ፡ አቤሜሌክ ፡ ሶበ ፡ አኮ ፡ ብእሲ ፡ ልሂቅ ፡ አንተ ፡ እምጸዐልኩከ ፡ ወእምሠሐቁ ፡ ላዕሌከ ፡ አላ ፡ ኢይከውን ፡ ከመ ፡ ያስተሐቅሩ ፡ ሰብአ ፡ ወብእሴ ፡ ልሂቀ ፤ ወሶበ ፡ አኮ ፡ ዘክመዘ ፡ እምእቤ ፡ ዘንጋዕከ ። ወበእንተሰ ፡ ዘትቤ ፡ ሕዝብ ፡ ተፄወዉ ፡ ውስተ ፡ ባቢሎን ፡ አስራበ ፡ ሰማይ ፡ ጥቀ ፡ ለእመ ፡ ወረደ ፡ ዲቤሆሙ ፡ ኢኮነ ፡ ጊዜሁ ፡ ከመ ፡ ይሖሩ ፡ ውስተ ፡ ባቢሎን ፤ ወአንተሰ ፡ ትቤ ፡ ተፄውዉ ፡ ውስተ ፡ ባቢሎን ። ወአንሰ ፡ በከመ ፡ ፈነወኒ ፡ አቡየ ፡ ኤርምያስ ፡ ሖርኩ ፡ ውስተ ፡ ዐጸደ ፡ ወይን ፡ ዘሀግሪጳስ ፡ በእንተ ፡ ኅዳጥ ፡ በለስ ፡ ከመ ፡ ነሀብ ፡ ለድውያን ፡ እለ ፡ ውስተ ፡ ሕዝብ ። ሖርኩ ፡ ወበጻሕኩ ፡ ህየ ፡ ወነሣእኩ ፡ ዘአዘዘኒ ፡ ወተመየጥኩ ፡ ወእንዘ ፡ አሐውር ፡ ረከብኩ ፡ ዕፀ ፡ ወነበርኩ ፡ ታሀቴሃ ፡ ከመ ፡ ኣጽልል ፡ እስመ ፡ ጊዜ ፡ ቀትር ፡ ውእቱ ፡ ወእምህየ ፡ አስመኩ ፡ ውስተ ፡ ሙዳየ ፡ በለስ ፡ ወኖምኩ ፡ ወነቂህየ ፡ መሰለኒ ፡ ዘጐንደይኩ ፡ ወከሠትኩ ፡ ዘንተ ፡ ሙዳየ ፡ በለስ ፡ ወረከብኩ ፡ እንዘ ፡ ያንጸፈጽፍ ፡ ሐለብ ፡ በከመ ፡ ነሣእክዎሙ ፡ ኀሪይየ ፡ ወነዋ ፡ ትብል ፡ አንተሰ ፡ ተፄወዉ ፡ ሕዝብ ፡ ውስተ ፡ ባቢሎን ፤ ወነዋ ፡ ርኢ ፡ ከመ ፡ ኢጸምሀየየ ፡ በለሱኒ ። ወክሠተ ፡ ሎቱ ፡ ሙዳየ ፡ በለስ ፡ ወአርአዮ ፤ ወነጸረ ፡ አረጋይ ፡ ከመ ፡ ሐዲስ ፡ ውእቱ ፡ በለስ ፡ ወያንጸፈጽፍ ፡ ሐሊቡ ። ወሶቤሃ ፡ አንከረ ፡ ውእቱ ፡ አረጋይ ፡ ወይቤሎ ፡ ለአቤሜሌክ ፡ ጻድቅ ፡ አንተ ፡ ወልድየ ፡ እስመ ፡ ኢፈቀደ ፡ እም ፡ ላክ ፡ ያርኢከ ፡ ሙስናሃ ፡ ለሀገር ፡ ወአምጽአ ፡ አምላክ ፡ ኑዛዜ ፡ ላዕሌከ ፡ ወአህየየከ ፡ ናሁ ፡ ዮም ፡ ስሳ ፡ ወስድስቱ ፡ ዓመት ፡ ኮነ ፡ እምአመ ፡ ተፄህወዉ ፡ ሕዝብ ፡ ውስተ ፡ ባቢሎን ። ወእመ ፡ ትፈቱ ፡ ታእምር ፡ ወትጠይቅ ፡ ወልድየ ፡ ነጽር ፡ ወርኢ ፡ ውስተ ፡ ገራውህ ፡ ከመ ፡ ሠርጸ ፡ አዝርእቲሃ ፡ ወለበለስኒ ፡ ከመ ፡ ኢኮነ ፡ ጊዜሁ ፤ ወአእመረ ፡ ከመ ፡ ኢኮነ ፡ ዘመኑ ፡ ለዝ ፡ ኵሉ ፡ ሶቤሃ ፡ አቤሜሌክ ፡ ይቤ ፡ በዐቢይ ፡ ቃል ፡ እባርከከ ፡ እግዚኦ ፡ አምላኪየ ፤ አምላከ ፡ ሰማይ ፡ ወምድር ፤ ዕረፍቶሙ ፡ ለነፍስ ፡ ጻድቃን ፡ በኵሉ ፡ በሓውርት ። ወይቤሎ ፡ ለአረጋይ ፡ አይ ፡ ውእቱ ፡ ዝንቱ ፡ ወርኅ ፡ ወይቤሎ ፡ ዐሡሩ ፡ ወሰኑዩ ፡ ለወርኀ ፡ ኔሳን ፡ ዘውእቱ ፡ ሚያዝያ ። ወእምድኅረ ፡ ዝንቱ ፡ ወሀቦ ፡ አቤሜሌክ ፡ ለዝንቱ ፡ አረጋይ ፡ እምዲበ ፡ ዝንቱ ፡ አብላስ ፡ ወይቤሎ ፡ አምላክ ፡ ይምራሕከ ፡ እንተ ፡ ላዕሉ ፡ ሀገረ ፡ ኢየሩሳሌም ። ወተንሥአ ፡ አቤሜሌክ ፡ ወወፅአ ፡ አፍኣ ፡ እምሀገር ፡ ወጸለየ ፡ ኀበ ፡ እግዚአብሔር ፡ ወናሁ ፡ መጽአ ፡ መልአክ ፡ ወመርሖ ፡ ኀበ ፡ ባሮክ ፡ ወረከቦ ፡ ውስተ ፡ መቃብር ፡ እንዘ ፡ ይነብር ።

    ወሶበ ፡ ተኣምኁ ፡ ወተባከዩ ፡ በበይናቲሆሙ ፡ ወተሳዐሙ ፡ ወርእየ ፡ በለሰ ፡ ውስተ ፡ ሙዳዩ ፡ ወአልዐለ ፡ አዕይንቲሁ ፡ ውስተ ፡ ሰማይ ፡ ወጸለየ ፡ እንዘ ፡ ይብል ፡ ዐቢይ ፡ ውእቱ ፡ አምላክ ፡ ዘይሁቦሙ ፡ ዐስቦሙ ፡ ለጻድቃኒሁ ፤ ተደልቂ ፡ ነፍስየ ፡ ወተፈሥሒ ፡ እንዘ ፡ ትንግሪ ፡ ልበድን ፡ ዘሥጋ ፡ ለቤት ፡ ቅዱስ ፡ ወላሕኪ ፡ ይትመየጥ ፡ ውስተ ፡ ብርሃን ፡ ወእምድኅረዝ ፡ ይመጽእ ፡ ምእመን ፡ ወያገብአኪ ፡ ውስተ ፡ በድንኪ ፤ ሐውጺ ፡ ውስተ ፡ ዘዚአኪ ፡ ድንግልና ፡ ሃይማኖት ፡ ወእመኒ ፡ ተሐይዊ ፤ ሐውጺ ፡ ውስተዝ ፡ በለስ ፡ ነዋ ፡ ስሳ ፡ ወስድስቱ ፡ ዓመት ፡ እምአመ ፡ ተቀሥሙ ፡ ወኢማሰኑ ፡ ወኢጼኡ ፡ አላ ፡ ሐሊቦሙ ፡ ያንጸፈጽፉ ፡ እስከ ፡ ይእዜ ፤ ከመዝ ፡ ይትገበር ፡ ዲቤኪ ፡ ሥጋየ ፡ እስመ ፡ ዐቀብኪ ፡ ትእዛዘኪ ፡ እምኀበ ፡ መልአክ ፡ ጽድቅ ፤ ዘዐቀበ ፡ ሙዳየ ፡ በለስ ፡ ውእቱ ፡ ካዕበ ፡ የዐቅበኪ ፡ በኀይለ ፡ ዚአሁ ። ወከመዝ ፡ ብሂሎ ፡ ባሮክ ፡ አውሥአ ፡ አቤሜሌክ ፡ ወይቤሎ ፡ ተንሥእ ፡ ካዕበ ፡ ንጸሊ ፡ ከመ ፡ ያርእየነ ፡ እግዚእ ፡ ቃላተ ፡ ዘንጽሕፍ ፡ ለኤርምያስ ፡ ውስተ ፡ ባቢሎን ፡ ክድነተ ፡ ዘከደነኒ ፡ ዲቤየ ። ወጸለየ ፡ ባሮክ ፡ ወይቤ ፡ ኀይልየ ፡ አምላክ ፡ እግዚእ ፡ ውእቱ ፡ ወብርሃን ፡ ዘይወፅእ ፡ እምአፉሁ ፡ ኣበድር ፡ ኣስተበቍዐከ ፡ ወእገኒ ፡ ለኂሩትከ ፤ ዐቢይ ፡ ስምከ ፡ ወአልቦ ፡ ዘይክል ፡ አእምሮቶ ፤ አፅምእ ፡ ጸሎተ ፡ ገብርከ ፡ ከመ ፡ እሙረ ፡ ይኩን ፡ በልብየ ፡ ፈቃደከ ፡ ለገቢር ፡ ወእፈኑ ፡ ለካህነ ፡ ዚአከ ፡ ኤርምያስ ፡ ውስተ ፡ ባቢሎን ። ወእንዘ ፡ ዘንተ ፡ ይጼሊ ፡ መጽአ ፡ መልአክ ፡ ወይቤሎ ፡ ባሮክ ፡ መካሬ ፡ ብርሃን ፡ ኢተኀሊ ፡ ከመ ፡ ትፈኑ ፡ አንተ ፡ ኀበ ፡ ኤርምያስ ፤ ኔሰመ ፡ በሰዐተ ፡ ብርሃን ፡ ይመጽእ ፡ ኀቤከ ፡ ንስር ፡ ወአንተ ፡ ለሊከ ፡ ሐውጽ ፡ በእንተ ፡ ኤርምያስ ፡ ወጸሐፍ ፡ ውስተ ፡ መጽሐፍ ፡ ወበሎሙ ፡ ከመዘ ፡ ለውሉደ ፡ እስራኤል ፡ ዘይከውን ፡ እንግዳ ፡ በውስቴትክሙ ፡ ይትፈለጥ ፡ እንተ ፡ ባሕቲቱ ፡ እስከ ፡ ዐሡር ፡ ወሐሙስ ፡ ዕለት ፡ ውእምድኅረዝ ፡ ኣበውአክሙ ፡ ውስተ ፡ ሀገር ፡ ይቤ ፡ እግዚእ ፤ ዘኢተፈልጠ ፡ በዐሡር ፡ ወሐሙስ ፡ እምባቢሎን ፡ ይባእ ፡ ኤርምያስ ፡ ውስተ ፡ ሀገር ፡ ወይዝልፎሙ ፡ ለሰብአ ፡ ባቢሎን ፡ ይቤ ፡ እግዚእ ። ወዘንተ ፡ ብሂሎ ፡ መልአክ ፡ ኀለፈ ፡ እምኀበ ፡ ባሮክ ፡ ወባሮክ ፡ ፈነዎ ፡ እስከ ፡ መርሕብ ፡ ውአምጽአ ፡ ክርታሰ ፡ ወማየ ፡ ሕመት ፡ ወጸሐፈ ፡ እንዘ ፡ ይብል ፡ በእንተ ፡ ባሮክ ፡ ገብረ ፡ አምላክ ፡ ይጽሕፍ ፡ መስሐፈ ፡ ለኤርምያስ ፡ ውስተ ፡ ፀዋ ፡ ባቢሎን ፡ ፍሥሓ ፡ ወሐሤት ፡ እስመ ፡ ዓምላክ ፡ ኢየኀድገነ ፡ ንፃእ ፡ ሕዙናኒነ ፡ በእንገ ፡ ጽዕለት ፡ ወሙስና ፤ በእንተዝ ፡ አስተምሐረ ፡ እግዚእ ፡ ዲበ ፡ አንብዕነ ፡ ወተዘከረ ፡ ሥርዐተ ፡ ዘአቅደመ ፡ ምስለ ፡ አበዊነ ፡ አብርሃም ፡ ይስሐቅ ፡ ወ ፡ ያዕቆብ ። ወፈነወ ፡ መላአኮ ፡ ኀቤየ ፡ ወነገረኒ ፡ እላንተ ፡ ነገረ ፡ ዘላአኩ ፡ ኀቤከ ፡ እላ ፡ እማንቱ ፡ ነገር ፡ ዘገብረ ፡ እግዚእ ፡ አምላከ ፡ እስራኤል ፡ ዘአውፅአነ ፡ እምድረ ፡ ግብጽ ፡ ዘእሳት ፡ እስመ ፡ ኢዐቀብክሙ ፡ ኵሎ ፡ ጽድቃቲሁ ፡ አላ ፡ አልዐልክሙ ፡ ክበከሙ ፡ ወአግዘፍክሙ ፡ ክሳደክሙ ፡ ቅድሜሁ ፡ ወመጠወክሙ ፡ ውስተ ፡ እቶነ ፡ ባቢሎን ፡ እስመ ፡ ኢሰማዕክሙ ፡ ቃልየ ፡ ይቤ ፡ እግዚአብሔር ፡ እምአፈ ፡ ኤርምያስ ፡ ቍልዔሁ ። ለእለ ፡ ሰምዑ ፡ ኣወፅኦሙ ፡ እምባቢሎን ፡ ወኢይከውኑ ፡ ነግደ ፡ እምኢየሩሳሌም ፡ በባቢሎን ። ወእመሰ ፡ ትፈቱ ፡ ታእምሮሙ ፡ ወታምክሮሙ ፡ ፍትኖሙ ፡ በማየ ፡ ዮርዳኖስ ፡ ወዘኢይሰምዕ ፡ ይትዓመር ፡ በተኣምረ ፡ ዝንቱ ፡ ትእምርት ፡ ዘየዐቢ ፡ ማኅተም ። ወተንሥአ ፡ ባሮክ ፡ ወወፅአ ፡ ጽሒፎ ፡ ከመዝ ፡ እመቃብር ። ወይቤሎ ፡ ንስር ፡ ባሐከ ፡ ባሮክ ፡ መጋቤ ፡ ሃይማኖት ፡ ወይቤሎ ፡ ባሮክ ፡ እስመ ፡ ኅሩይ ፡ አንተ ፡ እምኵሉ ፡ አዕዋፈ ፡ ሰማይ ፡ ትትናገር ፤ እምብርሃነ ፡ አዕይንቲከ ፡ እሙር ፡ አንተ ፤ ወይእዜኒ ፡ አርእየኒ ፡ ምንተ ፡ ትነብር ፡ በዝየ ። ወይቤሎ ፡ ንስር ፡ ተፈኖኩ ፡ ዝየ ፡ ከመ ፡ ኵሎ ፡ ቃለ ፡ ዘትፈቅድ ፡ ትልአከኒ ፡ ኪያየ ። ወይቤሎ ፡ ባሮክ ፡ ትክልኑ ፡ እላንተ ፡ ነገረ ፡ አብጽሖ ፡ ኀበ ፡ ኤርምያስ ፡ ውስተ ፡ ባቢሎን ፤ ወይቤሎ ፡ ንስር ፡ በእንተዝ ፡ ተፈነውኩ ። ወነሥአ ፡ ባሮክ ፡ መጽሐፈ ፡ ወ፲ወ፭በለሰ ፡ እምዝኩ ፡ ሙዳየ ፡ በለስ ፡ ዘአምጽአ ፡ አቤሜሌክ ፡ ወአሰረ ፡ ውስተ ፡ ክሳዱ ፡ ለንስር ። ወይቤሎ ፡ ለከ ፡ እብል ፡ ንስር ፡ ንጉሦሙ ፡ ለኵሎሙ ፡ አዕዋፍ ፡ ሖር ፡ በሰላም ፡ ወበሕይወት ፤ ዜና ፡ አምጽእ ፡ ለነ ፤ ወኢትትመሰሎ ፡ ለቋዕ ፡ ዘፈነዎ ፡ ኖኅ ፡ ወአበየ ፡ ገቢአ ፡ ዳግመ ፡ ኀቤሁ ፡ አላ ፡ ተመሰላ ፡ ለርግብ ፡ ዘሥልሰ ፡ አግብአት ፡ ቃለ ፡ ለኖኅ ፤ ከማሁ ፡ አንተኒ ፡ ንሣእ ፡ ዘንተ ፡ ቃላተ ፡ ሠናየ ፡ ለኤርምያስ ፡ ወለእለ ፡ ሀለዉ ፡ ምስሌሁ ፡ እስራኤል ፡ ከመ ፡ ሠናየ ፡ ይኩንከ ፡ ወንሣእ ፡ ዘንተ ፡ ትፍሥሕተ ፡ ለሕዝብ ፡ ኅሩያነ ፡ አምላክ ። ወእመኒ ፡ ዖዱከ ፡ አዕዋፍ ፡ ኵሉ ፡ ወኵሎሙ ፡ ጸላእያኒሃ ፡ ለጽድቅ ፡ እንዘ ፡ ይፈቅዱ ፡ ይቅትሉከ ፡ ተባደር ፡ ወእግዚእ ፡ የሀብከ ፡ ኀይለ ፡ ወኢትትመየጥ ፡ ኢለየማን ፡ ወኢለፀጋም ፡ አላ ፡ ከመ ፡ ሐጽ ፡ ዘየሐውር ፡ ርቱዐ ፡ ሖር ፡ በኀይለ ፡ አምላክ ። ወዘንተ ፡ ብሂሎ ፡ ባሮክ ፡ ሰረረ ፡ ንስር ፡ ምስለ ፡ መጽሐፍ ፡ ወሖረ ፡ ውስተ ፡ ባቢሎን ፡ ወአዕረፈ ፡ ዲበ ፡ ዐምድ ፡ ዘአፍኣ ፡ እምሀገር ፡ በመካን ፡ ዘገዳም ፡ ወጸንሐ ፡ ህየ ፡ እስከ ፡ የኀልፍ ፡ ኤርምያስ ፡ ወባዕዳን ፡ ሕዝብ ። ወኀለፉ ፡ እንተ ፡ ህየ ፡ ከመ ፡ ይቅብሩ ፡ ብእሴ ፡ ዘሞተ ፡ እስመ ፡ ሰአሎ ፡ ኤርምያስ ፡ ለናቡከደነጾር ፡ እንዘ ፡ ይብል ፡ ሀበኒ ፡ ምድረ ፡ ኀበ ። እቀብር ፡ እምሕዝብየ ፡ ወወሀቦ ። ወእንዘ ፡ የሐውሩ ፡ ወይበክዩ ፡ ላዕለ ፡ ዘሞተ ፡ በጽሑ ፡ ቅድመ ፡ ዝኩ ፡ ንስር ፡ ወጸርኀ ፡ ንስር ፡ በዐቢይ ፡ ቃል ፡ ወይቤ ፡ ለከ ፡ እብለከ ፡ ኤርምያስ ፡ ኅሩየ ፡ አምላክ ፡ ሑር ፡ ወአስተጋብኦሙ ፡ ለኵሎሙ ፡ ሕዝብ ፡ ወይምጽኡ ፡ ዝየ ፡ ከመ ፡ ይስምዑ ፡ ሠናየ ፡ ዜና ፡ ዘአምጻእኩ ። ወሰሚዖ ፡ ዘንተ ፡ ሰብሖ ፡ ለእግዚአብሔር ፡ ወሶቤሃ ፡ አስተጋብአ ፡ ኵሎ ፡ ሕዝበ ፡ ወአንስቲያሆሙ ፡ ወደቂቆሙ ፡ ወበጽሑ ፡ ኀበ ፡ ሀሎ ፡ ንስር ። ወወረደ ፡ ዝኩ ፡ ንስር ፡ ኀበ ፡ በድን ፡ ወኬዶ ፡ ወሐይወ ፡ ወዘንተ ፡ ገብረ ፡ ከመ ፡ ይእመኑ ፡ ወአንክሩ ፡ ኵሉ ፡ ሕዝብ ፡ በእንተ ፡ ዘኮነ ። ወይቤሉ ፡ ዮጊ ፡ ዝንቱ ፡ ውእቱ ፡ አምላክ ፡ ዘአስተርአዮሙ ፡ ለአበዊነ ፡ በገዳም ፡ ምስለ ፡ ሙሴ ፡ ወተመስለ ፡ በአምሳለ ፡ ንስር ፡ ወአስተርአየ ፡ ለነ ፡ ከመ ፡ እንተ ፡ ንስር ፡ ዐቢይ ። ወይቤሎ ፡ ንስር ፡ ለኤርምያስ ፡ እንዘ ፡ ይብል ፡ ነዓ ፡ ወስማዕ ፡ ዘንተ ፡ መጽሐፈ ፡ ወአንብብ ፡ ለሕዝብ ፡ ወአንበበ ፡ ሎሙ ። ወሶበ ፡ ሰምዑ ፡ ሕዝብ ፡ በከዩ ፡ ኵሎሙ ፡ ኅቡረ ፡ ወወደዩ ፡ ሐመደ ፡ ውስተ ፡ ርእሶሙ ፡ ወይቤልዎ ፡ ለኤርምያስ ፡ አድኅነነ ፤ ምንተ ፡ ንግበር ፡ ከመ ፡ ንግባእ ፡ ውስተ ፡ ሀገርነ ። ወተንሥአ ፡ ኤርምያስ ፡ ወይቤሎሙ ፡ ኵሎ ፡ ዘሰማዕክሙ ፡ ውስተ ፡ መጽሐፍ ፡ ከማሁ ፡ ግበሩ ፡ ወያገብአክሙ ፡ ውስተ ፡ ሀገርክሙ ። ወጸሐፈ ፡ ኤርምያስ ፡ መጽሐፈ ፡ ለባሮክ ፡ ከመዝ ፡ እንዘ ፡ ይብል ፡ ወልድየ ፡ ፍቁር ፡ ኢትትሀከይ ፡ ጸሎተ ፡ እንዘ ፡ ትገኒ ፡ ለአምላክ ፡ በእንቲአነ ፡ ከመ ፡ ይምርሐነ ፡ ውስተ ፡ ፍኖትነ ፡ እስከ ፡ ንወፅእ ፡ በትእዛዘ ፡ ዝንቱ ፡ ንጉሥ ፡ ኃጥእ ። ወአንተሰ ፡ ጽድቀ ፡ ረከብከ ፡ በቅድመ ፡ አምላክ ፡ ዘኢኀደገከ ፡ ትምጻእ ፡ ምስሌነ ፡ ከመ ፡ ኢትርአይ ፡ እኩየ ፡ ዘይትገበር ፡ ዲቤሆሙ ፡ ለሕዝብ ፡ በባቢሎን ። በከመ ፡ ፡ ዘቦ ፡ ውሉደአብ ፡ አሐደ ፡ ወውእቱ ፡ ተውህበ ፡ ከመ ፡ ይትክወነን ፡ ወእለ ፡ ሀለዉ ፡ ኀበ ፡ አቡሁ ፡ እለ ፡ ይናዝዝዎ ፡ ይከድኑ ፡ ገጾሙ ፡ ከመ ፡ ኢይርአይዎ ፡ ለአቡሁ ፡ የኀስር ፡ በሐዘን ፤ ከመዝ ፡ ኪያከ ፡ ተሣሀለከ ፡ አምላክ ፡ ወኢኀደገከ ፡ ትምጻእ ፡ ባቢሎን ፡ ከመ ፡ ኢትርአይ ፡ ምንዳቤ ፡ ሕዝብ ። እስመ ፡ እምአመ ፡ በጻሕነ ፡ ውስተ ፡ ዝንቱ ፡ ሀገር ፡ ኢያዕረፍነ ፡ እስከ ፡ ዮም ፡ እምሐዘን ፡ ስሳ ፡ ውስድስቱ ፡ ዓመት ፡ ዮም ፡ እንዘ ፡ ነኀሥሥ ፡ ንርከብ ፡ እምሕዝብ ፡ ስቁላን ፡ እምኀበ ፡ ናቡከደነጾር ፡ ንጉሥ ፡ እንዘ ፡ ይበክዩ ፡ ወይብሉ ፡ ተሣሀለነ ፡ አምላክ ፡ ሶር ፤ ወሶበ ፡ ሰማዕኩ ፡ ዘንተ ፡ ነገረ ፡ ሐዘንኩ ፡ ወበክይኩ ፡ ሶበ ፡ ይጼውዑ ፡ ካልአ ፡ አምላከ ፡ ስቁላን ፡ ወይብሉ ፡ ተሣሀለነ ፤ ወካዕበ ፡ እዜከር ፡ አነ ፡ በዓለ ፡ ዘገበርነ ፡ በኢየሩሳሌም ፡ ዘእንበለ ፡ ነፄወዉ ፡ ወተዘኪርየ ፡ እገብእ ፡ ውስተ ፡ ቤትየ ፡ እንዘ ፡ እጼዐር ፡ ወእበኪ ። ወይእዜኒ ፡ አስተብቍዑ ፡ ለአምላክነ ፡ በኀበ ፡ ሀለውክሙ ፡ አንተ ፡ ወአቤሜሌክ ፡ በእንተ ፡ ሕዝብ ፡ ከመ ፡ ይስምዑ ፡ ቃልየ ፡ ወንገረ ፡ አፉየ ፡ ከመ ፡ ይፃኡ ፡ እምነ ፡ ፋርስ ። ወይእዜኒ ፡ እብለከ ፡ ኵሎ ፡ መዋዕለ ፡ ዘነበርነ ፡ ዝየ ፡ አኀዙነ ፡ እንዘ ፡ ይብሉ ፡ ንግሩነ ፡ ማሕሌተ ፡ ሐዲሰ ፡ እመሓልዪሃ ፡ ለጽዮን ፡ መሓልየ ፡ ዘአምላክክሙ ፡ ወንቤሎሙ ፡ እፎ ፡ ነሐሊ ፡ ለክሙ ፡ እንዘ ፡ ሀሎነ ፡ ውስተ ፡ ምድረ ፡ ነኪር ። ከመዝ ፡ ጽሒፎ ፡ ኤርምያስ ፡ አሰረ ፡ መጽሐፎ ፡ ውስተ ፡ ክሳደ ፡ ንስር ፡ ወይቤሎ ፡ ሑር ፡ በሰላም ፡ ወእግዚእ ፡ የሐውጽ ፡ ላዕሌከ ። ወሖረ ፡ ንስር ፡ ወሰረረ ፡ ወአብጽሐ ፡ መጽሐፈ ፡ ኀበ ፡ ባሮክ ፡ ወነሢኦ ፡ ባሮክ ፡ አንበበ ፡ መጽሐፈ ፡ ወበከየ ፡ ሶበ ፡ ሰምዐ ፡ ሕማሞሙ ፡ ለሕዝብ ፡ ወምንዳቤሆሙ ። ወኤርምያስሰ ፡ ነሥአ ፡ ወእተ ፡ በለሰ ፡ ወወሀቦሙ ፡ ለድውያን ፡ ለእለ ፡ ውስተ ፡ ሕዝብ ፡ ወነበረ ፡ እንዘ ፡ ይሜህሮሙ ፡ ከመ ፡ እይግበሩ ፡ ምግባሮሙ ፡ ለሕዝበ ፡ ባቢሎን ።

    ወሶበ ፡ በጽሐ ፡ ዕለት ፡ በዘ ፡ ያወፅኦሙ ፡ አምላክ ፡ ለሕዝብ ፡ እምባቢሎን ፡ ወይቤሎ ፡ እግዚእ ፡ ለኤርምያስ ፡ ተንሥእ ፡ አንተ ፡ ወሕዝብከ ፡ ወንዑ ፡ ውስተ ፡ ዮርዳኖስ ፡ ወበሎሙ ፡ ለሕዝብ ፡ ይፈቅድ ፡ እግዚእ ፡ ይክድን ፡ ምግባረ ፡ ዘሕዝበ ፡ ባቢሎን ፤ ወለተባዕት ፡ ዘአውሰበ ፡ አንስተ ፡ በዲቤክሙ ፡ ወአንስትኒ ፡ እለ ፡ አውሰባ ፡ እምኔሆሙ ፡ ንፍትኖሙ ፤ ወእለ ፡ ሰምዑከሰ ፡ ኣገብኦሙ ፡ ውስተ ፡ ኢየሩሳሌም ፡ ወለእለሰ ፡ ኢሰምዑከ ፡ ኢትኅድጎሙ ፡ ይባኡ ፡ ውስቴታ ። ወኤርምያስ ፡ ከመዝ ፡ አንበበ ፡ ሎሙ ፡ ዘንተ ፡ ኵሎ ፡ ወአምጽኦሙ ፡ ውስተ ፡ ዮርዳኖስ ፡ ከመ ፡ ይፍትኖሙ ። ወእንዘ ፡ ይነግሮሙ ፡ ዘንተ ፡ ነገረ ፡ ዘይቤሎ ፡ እግዚእ ፡ ናፈቁ ፡ እለ ፡ አውሰቡ ፡ ወኢፈቀዱ ፡ ከመ ፡ ይስምዕዎ ፡ ለኤርምያስ ፡ ወቦ ፡ እለ ፡ ይቤልዎ ፡ ኢነኀድግ ፡ አንስቲያነ ፡ ለዓለም ፡ ንነሥኦን ፡ ምስሌነ ፡ ውስተ ፡ ሀገርነ ፤ ወኀለፉ ፡ እምዮርዳኖስ ፡ ወበጽሑ ፡ ውስተ ፡ ኢየሩሳሌም ። ወቆሙ ፡ ኤርምያስ ፡ ወባሮክ ፡ ወአቤሜሌክ ፡ እንዘ ፡ ይብሉ ፡ ኵሉ ፡ ብእሲ ፡ ዘአውሰበ ፡ እምባቢሎን ፡ ኢይበውእ ፡ ውስተ ፡ ሀገርነ ፤ ወይቤሉ ፡ እለ ፡ አውሰቡ ፡ አንስተ ፡ ለቢጾሙ ፡ ተንሥኡ ፡ ንግባእ ፡ ውስተ ፡ ባቢሎን ፡ ወኀለፉ ፡ ወገብኡ ። ወሶበ ፡ ርእይዎሙ ፡ ሰብአ ፡ ባቢሎን ፡ ወፅኡ ፡ ከመ ፡ ኢይትቀበልዎሙ ፡ ወኢኀደግዎሙ ፡ ከመ ፡ ይባኡ ፡ ውስተ ፡ ባቢሎን ፡ እንዘ ፡ ይብሉ ፡ አንትሙ ፡ ቅድመ ፡ ኪያነ ፡ ጸላእክሙነ ፡ ወበኅቡእ ፡ ወፃእክሙ ፡ እምኀቤነ ፡ ወበእንተ ፡ ዝንቱ ፡ ኢትበውኡ ፡ ውስተ ፡ ሀገርነ ፡ እስመ ፡ ተማሐልነ ፡ በስመ ፡ አምላክነ ፡ ከመ ፡ ኪያክሙ ፡ ወአዋልዲክሙ ፡ ኢንትዌከፍ ፡ እስመ ፡ በኅቡእ ፡ ኀለፍክሙ ፡ እምኀቤነ ። ወሰሚዖሙ ፡ ከመዝ ፡ ገብኡ ፡ ውስተ ፡ ኢየሩሳሌም ፡ ወሐነጹ ፡ ሎሙ ፡ አህጉረ ፡ ውስተ ፡ አድያሚሃ ፡ ለኢየሩሳሌም ፡ ወሰመይዋ ፡ ለዝኩ ፡ ሀገር ፡ ሰማርያ ፡ ወፈነወ ፡ ኀቤሆሙ ፡ ኤርምያስ ፡ እንዘ ፡ ይብል ፡ ነስሑ ፡ ወንዋ ፡ ይመጽእ ፡ መልአከ ፡ ጽድቅ ፡ ወያገብአክሙ ፡ ውስተ ፡ መካንክሙ ፡ ዘነዋኅ ።

    ወነበሩ ፡ እንዘ ፡ ይትፌሥሑ ፡ ወይሠውዑ ፡ ሰቡዐ ፡ ዕለተ ፡ በእንተ ፡ ሕዝብ ። ወአመ ፡ ዐሡር ፡ ዕለት ፡ እምዘ ፡ ተገብረ ፡ ዝንቱ ፡ አዕረገ ፡ ኤርምያስ ፡ መሥዋዕተ ፡ ባሕቲቱ ። ወጸለየ ፡ ኤርምያስ ፡ እንዘ ፡ ይብል ፡ ቅዱስ ፡ ቅዱስ ፡ ቅዱስ ፡ አንተ ፡ መዐዛ ፡ ጥዑም ፡ ለሰብእ ፡ ወ ፡ ብርሃን ፡ ዘበአማን ፡ ዘታበርህ ፡ ሊተ ፡ እስከ ፡ አነ ፡ እበጽሕ ፡ ቅድሜከ ፤ ኣስተበቍዐከ ፡ በእንተ ፡ ሕዝብከ ፡ ወእስእለከ ፡ በእንተ ፡ ቃለ ፡ መዐርዒር ፡ ዘሱራፌል ፡ ወበእንተ ፡ መዐዛ ፡ ዕጣን ፡ ዘኪሩቤል ፤ እስእለከ ፡ እወ ፡ ማሕሌታይ ፡ ሚካኤል ፡ መልአክ ፡ ጽድቅ ፡ ውእቱ ፡ ዘያርኁ ፡ አናቅጸ ፡ ጽድቅ ፡ እስከ ፡ ይበውእዎን ፡ ኣስተበቍዐከ ፡ እግዚእ ፡ ለኵሉ ፡ ወእግዚእ ፡ ዘኵሎ ፡ ይእኅዝ ፡ ወኵሎ ፡ ፈጠረ ፡ ዘያስተርኢ ፡ ወዘኢተወልደ ፡ ዘኵሎ ፡ ፈጸመ ፡ ወኵሉ ፡ ፍጥረት ፡ ኅቡእ ፡ ሀሎ ፡ ኀቤሁ ፡ ዘእንበለ ፡ ይትገበሩ ፡ በኅቡእ ። ወዘንተ ፡ ጸለየ ፡ ወፈጺሞ ፡ ጸሎቶ ፡ ቆመ ፡ ኤርምያስ ፡ ውስተ ፡ ቤተ ፡ መቅደስ ፡ ወምስሌሁ ፡ ባሮክ ፡ ወአቤሜሌክ ፡ ወኮነ ፡ ኤርምያስ ፡ ከመ ፡ አሐዱ ፡ ብእሲ ፡ ዘወፅአ ፡ ነፍሱ ፡ እምላዕሌሁ ። ወሶቤሃ ፡ ወድቁ ፡ ባሮክ ፡ ወአቤሜሌክ ፡ ወዐውየዉ ፡ በዐቢይ ፡ ቃል ፡ ወይቤሉ ፡ ወይ ፡ ለነ ፡ አቡነ ፡ ኤርምያስ ፡ ካህነ ፡ አምላክ ፡ ኀለፈ ፡ እምኔነ ። ወሰሚዖሙ ፡ ከመዝ ፡ ሕዝብ ፡ ሮጹ ፡ ኀቤሁ ፡ ወረከብዎ ፡ ለኤርምያስ ፡ ውዱቀ ፡ ወምውተ ፡ ወበከዩ ፡ ወሠጠጡ ፡ አልባሲሆሙ ፡ ወወደዩ ፡ ሐመደ ፡ ዲበ ፡ ርእሶሙ ፡ ወበከዩ ፡ ብካየ ፡ መሪረ ። ወእምድኅረ ፡ አስተዳለዉ ፡ በዘ ፡ ይቀብርዎ ፡ መጽአ ፡ ቃል ፡ ዘይብል ፡ ኢትግንዝዎ ፤ ሕያው ፡ ውእቱ ፡ ወነፍሱ ፡ ትገብእ ፡ ዲበ ፡ ሥጋሁ ፡ ዳግመ ። ወሰሚዖሙ ፡ ዘንተ ፡ ቃለ ፡ ኢገነዝዎ ፡ አላ ፡ ነበሩ ፡ እንዘ ፡ የዐቅብዎ ፡ ዐውዶ ፡ ሠሉሰ ፡ መዋዕለ ፡ እስከ ፡ ትገብእ ፡ ነፍሱ ፡ ውስተ ፡ ሥጋሁ ። ወኮነ ፡ ቃል ፡ በማእክለ ፡ ኵሎሙ ፡ ወይቤ ፡ ሰብሕዎ ፡ በአሐዱ ፡ ቃል ፡ ሰብሕዎ ፡ ለአምላክ ፡ ወኵልክሙ ፡ ሰብሑ ፡ ለመሲሕ ፡ ወልደ ፡ አምላክ ፡ ዘያንቅሀክሙ ፡ ወይኴንነክሙ ፡ ኢየሱስ ፡ ወልደ ፡ አምላክ ፡ ብርሃን ፡ ለኵሉ ፡ ዓለም ፡ ወማኅቶት ፡ ዘኢይጠፍእ ፡ ወሕይወት ፡ ዘሃይማኖት ። ወይከውን ፡ እምድኅረዝ ፡ መዋዕል ፡ ሠላስ ፡ ምእት ፡ ወሠላስ ፡ ሰንበታት ፡ ዘመዋዕል ፡ ለምጽአቱ ፡ ውስተ ፡ ምድር ፡ ዕፅ ፡ ሕይወት ፡ ዘሀሎ ፡ ውስተ ፡ ገነት ፡ ወኢተተክለ ፡ ይሬስይሙ ፡ ለኵሉ ፡ ዕፅ ፡ ዘያወፅእ ፡ ፍሬ ፡ ወይቡሳነ ፡ ከመ ፡ ይምጽኡ ፡ ኀቤሁ ፡ ወይሬስዮሙ ፡ ከመ ፡ ይግበሩ ፡ ፍሬ ፡ ወይሥረጹ ፡ ወፍሬሆሙ ፡ ይነብር ፡ ምስለ ፡ መላእክት ። ወበእንተ ፡ ተክለ ፡ ዕፀው ፡ ከመ ፡ ይለምልሙ ፡ ወያንኁ ፡ ነሀብ ፡ ጸባሕተ ፡ ለኢዮር ፡ ከመ ፡ ኢይይበስ ፡ ሥረዊሆሙ ፡ ከመ ፡ ተክል ፡ ዘኢአኀዘ ፡ ሥርዉ ፡ ምድረ ። ወዘሕብረ ፡ ቀይሕ ፡ ያጸዐዱ ፡ ከመ ፡ ፀምር ፡ ወማይ ፡ ዘጥዑም ፡ መሪረ ፡ ይከውን ፡ ወመሪር ፡ ጥዑመ ፡ ይከውን ፡ በዐቢይ ፡ ሐሤት ፤ ወትፍሥሕታተ ፡ አምላክ ፡ ለደሰያት ፡ ከመ ፡ ይፍረዩ ፡ ፍሬ ፡ በነገረ ፡ አፉሁ ፡ ወልደ ፡ ዚአሁ ። ወውእቱ ፡ ለሊሁ ፡ ይበውእ ፡ ውስተ ፡ ዓለም ፡ ወየኀሪ ፡ ሎቱ ፡ ሐዋርያተ ፡ ዐሠርተ ፡ ወክልኤተ ፡ ከመ ፡ ይትረአይ ፡ ሎሙ ፡ ዘአነ ፡ ርኢኩ ፡ ስርግወ ፡ ዘይትፌኖ ፡ እምኀበ ፡ አቡሁ ፡ ዘይመጽእ ፡ ውስተ ፡ ዓለም ፡ ወውስተ ፡ ደብረ ፡ ዘይት ፡ ይከይድ ፡ ወያጸግብ ፡ ነፍሰ ፡ ርኅብተ ። ወከመዝ ፡ ነገረ ፡ ኤርምያስ ፡ በእንተ ፡ ወልደ ፡ አምላክ ፡ ከመ ፡ ይመጽእ ፡ ውስተ ፡ ዓለም ። ወሶበ ፡ ሰምዑ ፡ ዘንተ ፡ ሕዝብ ፡ ተምዑ ፡ በእንተ ፡ ዝንቱ ፡ ወይቤሉ ፡ ዝንቱ ፡ ውእቱ ፡ ነገራት ፡ ዘኢሳይያስ ፡ ወልደ ፡ አሞጽ ፡ ዘይብል ፡ ርኢኩ ፡ አምላከ ፡ ወልደ ፡ አምላክ ፤ ይእዜኒ ፡ ተንሥኡ ፡ ንግበር ፡ ዲቤሁ ፡ በከመ ፡ ገበርነ ፡ ዲበ ፡ ኢሳይያስ ፡ ወይቤሉ ፡ መንፈቆሙ ፡ አልቦ ፤ ዳእሙ ፡ በእብን ፡ ንወግሮ ። ወጸርኁ ፡ ሎሙ ፡ ባሮክ ፡ ወአቤሜሌክ ፡ እንዘ ፡ ይብሉ ፡ በዛቲ ፡ ሞት ፡ ኢትቅትልዎ ። ወሐዘኑ ፡ ባሮክ ፡ ወአቤሜሌክ ፡ በእንተ ፡ ኤርምያስ ፡ ወዓዲ ፡ ኢኀደግዎ ፡ ይዜንዎሙ ፡ ኅቡኣተ ፡ ዘርእየ ። ወይቤሎሙ ፡ ኤርምያስ ፡ አርምሙ ፡ ኢትብክዩ ፡ እስመ ፡ ኢይክሉ ፡ ቀቲሎትየ ፡ እስከ ፡ እዜንወክሙ ፡ ኵሎ ፡ ዘርኢኩ ፤ ወይእዜኒ ፡ አምጽኡ ፡ ሊተ ፡ አሐተ ፡ እብነ ፡ ወአምጽኡ ፡ ሎቱ ፡ እብነ ፡ አሐተ ፡ ወአቀማ ፡ ወይቤ ፡ ብርሃን ፡ ዘለዓለም ፡ ረሲ ፡ ዛተ ፡ እብነ ፡ ከመ ፡ ርእየተ ፡ ሰብእ ፡ ትኩን ፤ ወሶቤሃ ፡ ኮነ ፡ እብን ፡ በርእየተ ፡ ኤርምያስ ፡ ዘይመስሎ ። ወአኀዙ ፡ ይውግርዎ ፡ ለእብን ፡ እንዘ ፡ ይመስሎሙ ፡ ኤርምያስሃ ። ወኤርምያስ ፡ ዜነዎሙ ፡ ለባሮክ ፡ ወለአቤሜሌክ ፡ ኵሎ ፡ ዘርእየ ፡ ኅቡኣተ ፡ ወእምድኅረዝ ፡ ፈጺሞ ፡ ነጊሮቶሙ ፡ ሖረ ፡ ወቆመ ፡ ማእከለ ፡ ሕዝብ ፡ ፈቂዶ ፡ ከመ ፡ ይፈጽም ፡ ምግቦ ። ወሶቤሃ ፡ ጸርኀ ፡ ሎሙ ፡ ዝኩ ፡ እብን ፡ ወይቤ ፡ ኦአብዳን ፡ ደቂቀ ፡ እስራኤል ፡ በእንተ ፡ ምንት ፡ ትዌግሩኒ ፡ እንዘ ፡ ታመስሉኒ ፡ ኤርምያስሃ ፡ ወኤርምያስ ፡ ንዋ ፡ ማእከሌክሙ ፡ ይቀውም ። ወሶበ ፡ ርእይዎ ፡ ሮጹ ፡ ምስለ ፡ ብዙኅ ፡ እብን ፡ ወፈጸሙ ፡ ዐልዎ ፡ ወቀበርዎ ፡ ወነሥኡ ፡ ወእተ ፡ እብነ ፡ ወአንበሩ ፡ ውስተ ፡ መቃብሪሁ ፡ ወረሰይዎ ፡ ከመ ፡ እንተ ፡ ማዕጾ ፡ ወጸሐፉ ፡ ውስቴቱ ፡ እንዘ ፡ ይብሉ ፡ ነዋ ፡ ዝንቱ ፡ ውእቱ ፡ ረድኡ ፡ ለኤርምያስ ።