መጽሐፍ ፡ ዘኤርምያስ ፡

 

 

    1 አርአያ ፡ መጽሐፍ ፡ ዘኤርምያስ ፡ ዘፈነወ ፡ ኀበ ፡ እለ ፡ ፄወዎሙ ፡ ባቢሎን ፡ ንጉሠ ፡ ባቢሎን ፡ ይንግርዎሙ ፡ ዘአዘዞ ፡ እግዚአብሔር ። 2 በእንተ ፡ ኀጢአትክሙ ፡ ዘአበስክሙ ፡ ለእግዚአብሔር ፡ ወሰዱክሙ ፡ ባቢሎን ፡ 3 ትንበሩ ፡ ህየ ፡ ብዙኀ ፡ መዋዕለ ፡ እስከ ፡ ሳብዕ ፡ ትውልድ ፡ ወእምዝ ፡ ኣወፅአክሙ ፡ እምህየ ፡ በሰላም ። 4 ወይእዜሰ ፡ ትፌእዩ ፡ ባቢሎን ፡ አማልክተ ፡ ዘወርቅ ፡ ወዘብሩር ፡ ወዘዕፀው ፡ ይጸውርዎሙ ፡ በመታክፍቲሆሙ ፡ ወይጌርምዎሙ ፡ ለአሕዛብ ። 5 ዑቁ ፡ እንከ ፡ ኢትኩኑ ፡ ከማሆሙ ፡ እመ ፡ ርኢክሙ ፡ አሕዛብ ፡ በቅድሜሆሙ ፡ ወበድኅሬሆሙ ፡ ይሰግዱ ፡ ሎሙ ። 6 በሉ ፡ በልብክሙ ፡ ለከ ፡ ርቱዕ ፡ ይስግዱ ፡ እግዚኦ ።  8 እስመ ፡ ቦሙ ፡ ልሳነ ፡ ዘይገብሮ ፡ ጸራቢ ፡ ወውእቱሂ ፡ ዘወርቅ ፡ ወዘብሩር ፤ ሐሰት ፡ እሙንቱ ፡ ወኢይክሉ ፡ ተናግሮ ። 9 ወከመ ፡ ድንግል ፡ እንተ ፡ ስርጉት ፡ በወርቅ ፡ ገብሩ ፡ ሎሙ ፡ ቀጸላ ፡ ዘወርቅ ፡ ወዘብሩር ፡ 11 ወያለብስዎሙ ፡ ከመ ፡ ሰብእ ፤ 12 ወለርእሶሙ ፡ ኢያኀድጉ ፡ ዛኅሎሙ ፡ ወይከድንዎሙ ፡ በሜላት ፡ 13 ወይመዘምዝዎሙ ፡ እምጸበለ ፡ ቤት ። 14 ወይእኅዙ ፡ በትረ ፡ ከመ ፡ ሰብእ ፡ ወለዘገፍዖሙሂ ፡ ኢይትቤቀልዎ ። 15 ወቦ ፡ ውስተ ፡ እዴሁ ፡ ጕድብ ፡ ወርእሶ ፡ ኢያድኅን ፡ እምሰረቅት ። 16 ወበዝንቱ ፡ ይትዐወቁ ፡ ከመ ፡ ኢኮኑ ፡ አማልክተ ፤ ኢትፍርህዎሙ ፡ እንከ ። 17 ከመ ፡ ንዋይ ፡ ዘይትቀጠቀጥ ፡ ወኢይበቍዕ ፡ ከማሁ ፡ አማልክቲሆሙ ፡ ወይቄንውዎሙ ፡ ውስተ ፡ ቤት ፡ ወይመልእ ፡ ውስተ ፡ አዕይንቲሆሙ ፡ ጸበል ፡ እምእግረ ፡ ሰብእ ፡ ዘይበውእ ። 18 ወየዐጽውዎሙ ፡ ገነውቶሙ ፡ ከመ ፡ ኢይስርቅዎሙ ። 19 መኃትወ ፡ ያኀትዉ ፡ ሎሙ ፡ ወአልቦ ፡ ዘይሬእዩ ። 20 ወእመሂ ፡ ሄድዎሙ ፡ አልባሲሆሙ ፡ ኢያአምሩ ። 21 ወይጸልም ፡ ገጾሙ ፡ እምጢስ ፡ ዘያጠይሱ ፡ ውስተ ፡ ቤት ። 22 ወይነብሩ ፡ ውስተ ፡ አርእስቲሆሙ ፡ ጽግነት ፡ ወአዕዋፍ ፡ ወድመት ። 23 ወበዝንቱ ፡ ታአምሩ ፡ ከመ ፡ ኢኮኑ ፡ አማልክተ ፤ ኢትፍርህዎሙ ፡ እንከ ። 24 እስመ ፡ ወርቅ ፡ እመ ፡ አንበርዎ ፡ ወኢሐብረትዎ ፡ ኢይበርህ ፡ ወሶበሂ ፡ ይሰበኩ ፡ ኢያአምሩ ። 25 ወአልቦሙ ፡ መንፈሰ ። 26 ወይጸውርዎሙ ፡ ዲበ ፡ መትከፍት ፡ ከመ ፡ ይትዐወቅ ፡ ኀሳሮሙ ። 27 ወእመሂ ፡ ወድቁ ፡ ውስተ ፡ ምድር ፡ ኢይትነሥኡ ፡ ለሊሆሙ ፡ ወእመሂ ፡ አንሥእዎሙ ፡ ኢይቀውሙ ፡ ለሊሆሙ ። ከመ ፡ ምውት ፡ ያቄርቡ ፡ መብልዐ ፡ ወመሥዋዕተ ፡ 28 ወይበልዕዎሙ ፡ ገነውቶሙ ። 29 በዝኬ ፡ አእምሩ ፡ ከመ ፡ ኢኮኑ ፡ አማልክተ ፡ ወኢትፍርህዎሙ ። 30 ዕፀው ፡ ወእብን ፡ እሙንቱ ። 32 ወአመሂ ፡ ዐውየዉ ፡ ሎሙ ፡ ኢይሰምዑ ። 34 ወኢይክሉ ፡ ገቢረ ፡ ወኢ ፡ አሠንዮ ፡ ወኢእኩየ ። ኢያነግሡ ፡ ወኢይስዕሩ ፤ 35 ኢያብዕሉ ፡ ወኢያነድዩ ፤ ወኢይቀትሉ ፡ ወኢያሐይዉ ። 36 ወኢያድኅንዎ ፡ ለድኩም ፡ እምእደ ፡ ዘይትዔገሎ ። 48 ወእመሂ ፡ መጽኦሙ ፡ ጸባኢት ፡ የኀሥሡ ፡ ገነውቶሙ ፡ ኀበ ፡ ይትኀብኡ ፡ ምስሌሆሙ ። 49 እፎ ፡ እንከ ፡ እሙንቱ ፡ አማልክት ፡ ዘርእሶሙ ፡ ኢያድኅኑ ። 51 ወይትዐወቁ ፡ ከመ ፡ ግብረ ፡ እደ ፡ እጓለ ፡ እመሕያው ፡ እሙንቱ ፡ ወአልቦሙ ፡ ግብረ ፡ አምላክ ። 53 ኢያዘንሙ ፡ 54 ወኢያኀድጉ ፡ ከመ ፡ ቋዓት ፡ ማእከለ ፡ ሰማይ ፡ ወምድር ። 55 ወእመሂ ፡ ውዕየ ፡ ቤተ ፡ አማልክት ፡ ገነውቶሙ ፡ ይጐዩ ፡ ወያድኅኑ ፡ ነፍሶሙ ፡ ወእሙንቱሰ ፡ ከመ ፡ ሰርዌ ፡ ይውዕዩ ፡ በማእከል ። 56 ወእፎ ፡ እንከ ፡ አማልክት ፡ እሙንቱ ፡ 57 ዘኢይትቤቀሉ ፡ ወኢያድኅኑ ፡ ርእሶሙ ፡ እምሰራቂ ። 59 ሐሰዉኬ ፡ ወኢኮኑ ፡ አማልክተ ፤ ማዕፆ ፡ ጥቀ ፡ ያድኅን ፡ ዘውስተ ፡ ቤት ። 66 ወኢይረግሙ ፡ ወኢይድኅሩ ፡ 67 ወኢያርእዩ ፡ ትእምርተ ፡ በሰማይ ፡ ወኢያበርሁ ፡ ከመ ፡ ፀሓይ ፡ ወወርኅ ። 68 እንስሳ ፡ ይኄይሶሙ ፡ ዘይክል ፡ ጐይየ ። 71 ከመ ፡ በድን ፡ ዘውስተ ፡ ጽልመት ፡ ይነብር ፡ ከማሁ ፡ አማልክቲሆሙ ። 73 ይኄይስ ፡ ብእሲ ፡ ዘአልቦ ፡ ጣዖተ ፡ ወርሕቀ ፡ እምጽዕለት ።