ዘባሮክ ።

 

 

1    1 ዝነገረ ፡ መጽሐፍ ፡ ዘጸሐፈ ፡ ባሮክ ፡ ወልደ ፡ ኔርዩ ፡ ወልደ ፡ ማሴው ፡ ወልደ ፡ ሴዴቅዩ ፡ ወልደ ፡ ኬልቅዩ ፡ [በ]ባቢሎን ፡ 2 በኃምስ ፡ ዓመት ፡ በሰቡዐ ፡ ሠርቅ ፡ አመ ፡ ነሥእዋ ፡ ፋርስ ፡ ለኢየሩሳሌም ፡ ወአውዐይዋ ፡ በእሳት ። 3 ወአንበባ ፡ ባሮክ ፡ ዘመጽሐፈ ፡ በኀበ ፡ ኢኮንያ ፡ ወልደ ፡ ኢዮአቄም ፡ ንጉሠ ፡ ይሁዳ ፡ ወኵሉ ፡ ሕዝብ ፡ ዘመጽአ ። 7 ወለአከ ፡ ኢየሩሳሌም ፡ ኀበ ፡ ካህናት ፡ 8 አመ ፡ ነሥኡ ፡ ንዋየ ፡ ቤተ ፡ እግዚአብሔር ፡ እምቤተ ፡ መቅደስ ፡ ወገብረ ፡ ሴዴቅያስ ፡ ንዋየ ፡ ብሩር ፡ 9 እምድኅረ ፡ አፍለሶ ፡ ናቡከደነፆር ፡ ለኢኮንያ ፡ ወለሕዝበ ፡ ኢየሩሳሌም ፡ ወወሰዶሙ ፡ ባቢሎን ፡ 10 ወፈነወ ፡ ሎሙ ፡ ወርቀ ፡ ወይቤ ፡ 11 ጸልዩ ፡ በእንተ ፡ ሕይወተ ፡ ናቡከደነፆር ፡ ንጉሠ ፡ ባቢሎን ፡ ወበእንተ ፡ ሕይወተ ፡ ብልጣሶር ፡ ወልዱ ፡ ከመ ፡ ይኩን ፡ መዋዕሊሆሙ ፡ ከመ ፡ መዋዕለ ፡ ሰማይ ፡ ዲበ ፡ ምድር ፤ 13 ወጸልዩ ፡ ለነሂ ፡ ኀበ ፡ እግዚአብሔር ፡ አምላክነ ፡ እስመ ፡ አበስነ ፡ ለእግዚአብሔር ፡ አምላክነ ፤ 14 ወአንብብዋ ፡ ለዛ ፡ መጽሐፍ ፡ በቤተ ፡ እግዚአብሔር ፡ በዕለተ ፡ በዓል ፡ 15 ወበሉ ፡ ጽድ[ቅ] ፡ ለእግዚአብሔር ፡ አምላክነ ፡ ወለነሰ ፡ ኀፍረት ፡ ለገጽነ ፡ ለሰብአ ፡ ይሁዳ ፡ ወኢየሩሳሌም ፡ 16 ወለነገሥትነ ፡ ወለመላእክቲነ ፡ ወለካህናቲነ ፡ ወለነቢያቲነ ። 18 ወኢሰማዕነ ፡ ቃለ ፡ እግዚአብሔር ፡ አምላክነ ፡ ወኢሖርነ ፡ በትእዛዘ ፡ እግዚአብሔር ፡ አምላክነ ፡ ዘወሀበነ ። 19 እምአመ ፡ አውፅኦሙ ፡ ለአበዊነ ፡ እምድረ ፡ ግብጽ ፡ እስከዛ ፡ ዕለት ፡ ዐለውናሁ ፡ ለእግዚአብሔር ፡ አምላክነ ፡ 20 ወረከበነ ፡ ዝመርገም ፡ እኩይ ፡ ²²እስመ ፡ ሖርነ ፡ ወተቀነይነ ፡ ለአማልክተ ፡ ነኪር ።