መጽሐፈ ፡ ሄኖክ ።

 

 

1    ቃለ ፡ በረከት ፡ ዘሄኖክ ፡ ዘከመ ፡ ባረከ ፡ ኅሩያነ ፡ ወጻድቃነ ፡ እለ ፡ ሀለዉ ፡ ይኩኑ ፡ በዕለተ ፡ ምንዳቤ ፡ ለአሰስሎ ፡ ኵሉ ፡ እኩያን ፡ ወረሲዓን ። ወአውሥአ ፡ ወይቤ ፡ ሄኖክ ፡ ብእሲ ፡ ጻድቅ ፡ ዘእምኀበ ፡ እግዚአብሔር ፡ እንዘ ፡ አዕይንቲሁ ፡ ክሡታት ፡ ወይሬኢ ፡ ራእየ ፡ ቅዱሰ ፡ ዘበሰማያት ፡ ዘአርአዩኒ ፡ መላእክት ፡ ወሰማዕኩ ፡ እምኀቤሆሙ ፡ ኵሎ ፡ ወአእመርኩ ፡ አነ ፡ ዘእሬኢ ፡ ወአኮ ፡ ለዝ ፡ ትውልድ ፡ አላ ፡ ለዘይመጽእ ፡ ትውልድ ፡ ርኁቃን ። በእንተ ፡ ኅሩያን ፡ እቤ ፡ ወአውሣእኩ ፡ በእንቲአሆሙ ፡ ምስለ ፡ ዘይወፅእ ፡ ቅዱስ ፡ ወዐቢይ ፡ እማኅደሩ ፡ ወአምላከ ፡ ዓለም ። ወእምህየ ፡ ይከይድ ፡ ዲበ ፡ ሲና ፡ ደብር ፡ ወያስተርኢ ፡ በትዕይንቱ ፡ ወያስተርኢ ፡ በጽንዐ ፡ ኀይሉ ፡ እምሰማይ ። ወይፈርህ ፡ ኵሉ ፡ ወያድለቀልቁ ፡ ትጉሃን ፡ ወይነሥኦሙ ፡ ፍርሀት ፡ ወረዓድ ፡ ዐቢይ ፡ እስከ ፡ አጽናፈ ፡ ምድር ። ወይደነግፁ ፡ አድባር ፡ ነዋኃን ፡ ወይቴሐቱ ፡ አውግር ፡ ነዋኃት ፡ ወይትመሰዉ ፡ ከመ ፡ መዓረ ፡ ግራ ፡ እምላህብ ። ወትሠጠም ፡ ምድር ፡ ወኵሉ ፡ ዘውስተ ፡ ምድር ፡ ይትሐጐል ፡ ወይከውን ፡ ፍትሕ ፡ ላዕለ ፡ ኵሉ ፡ ወላዕለ ፡ ጻድቃን ፡ ኵሎሙ ። ለጻድቃንሰ ፡ ሰላመ ፡ ይገብር ፡ ሎሙ ፡ ወየዐቅቦሙ ፡ ለኅሩያን ፡ ወይከውን ፡ ሣህል ፡ ላዕሌሆሙ ፡ ወይከውኑ ፡ ኵሎሙ ፡ ዘአምላክ ፡ ወይሤርሑ ፡ ወይትባረኩ ፡ ወይሀርህ ፡ ሎሙ ፡ ብርሃነ ፡ አምላክ ። ወናሁ ፡ መጽአ ፡ በትእልፈት ፡ ቅዱሳን ፡ ከመ ፡ ይግበር ፡ ፍትሐ ፡ ላዕሌሆሙ ፡ ወያሐጕሎሙ ፡ ለረሲዓን ፡ ወይትዋቀስ ፡ ኵሎ ፡ ዘሥጋ ፡ በእንተ ፡ ኵሉ ፡ ዘገብሩ ፡ ወረሰዩ ፡ ላዕሌሁ ፡ ኃጥአን ፡ ወረሲዓን ።